Kordenador Forsa Tarefa ba Prevensaun no Mitigasaun Surtu Covid-19 Dr. Rui Maria de Araujo informa katak durante loron tolu prosesu teste masal husi ekipa prevensaun mitigasaun Covid-19, deteta tan ema na’in rua (2) konfirmadu positivu iha aldeia Terra Santa, Raikotu BTN 2 Tasitolu, Dili.

Entre ema na’in 289 ne’ebé halo teste masal no foti sira nia amostra, deteta na’in rua mak konfirmadu positivu. Sira na'in rua ne'e, servisu administrasaun publika iha Ministeriu ida.

“Husi restreu ba kontatu ne’ebé ita halo iha bairo BTN 2, Tasitolu na’in rua mak hetan positivu ohin lorokraik, husi 289 ne’ebé ita halo amostra,” dehan Dr. Rui iha sala SIJK, CCD Dili, Ohin.

Tanba ne’e, aban segunda-feira, Sala Situasaun Integradu Jestaun Krize (SIJK) sei hatoo proposta konkreta ba Konsellu Ministru atu bele toma desizaun kona-ba medidas ba Munisipiu Dili.

Nia hatete, molok iha desizaun ruma husi Konsellu Ministru, sei kontinua aplika serka sanitaria ou konfinamentu.

“Ohin sala situasaun integradu jestaun krize konrdena ona autoridade seguransa atu temporariamente blokea aldeia terra santa no imediata atu garante komunidade nafatin iha uma,”dehan Dr. Rui.

Dr. Rui mós apela ba komunidade sira iha Dili laran, hahu aban segunda-feira (8/3), dadersan sei laiha atividade movimentasaun.

Ekipa prevensaun mitigasaun Covid-19 kontinua buka tuir ema ne’ebé halo kontaktu direita ho ema na’in rua ne’ebé positivu.

Kapital Dili hahu afeitadu hafoin deteta konfirmadu positivu iha Munisipiu Covalima no daet ba too iha Munisipiu Baukau.

Tuir dadus  kazu foun hamutuk na'in tolu, na'in rua husi Dili ne'ebe relata ohin kalan no na'in ida husi Covalima relata horseik lokraik. Nune;e pasiente moras Covid-19 hamutuk 28, ne’ebé sei iha sala izolamentu Vera Crus Dili.