Prezidente informa, benifisiariu sira ne’ebé hatama ona dokumentus ba iha INSS, maibé naran laiha lista, ne’e iha razaun lubuk ida ne’ebé presiza tenki hadia.
Ezemplo, hanesan numeru kartaun eleitoral no data moris mak lahanesan iha dokumentus ne’ebé hatama, nune’e haruka sira ba hadia, maibé to’o ohin loron la fila mai no dala ruma dokumentus sira ne’e sei iha Munisipiu, seidauk lori mai iha nivel nasional.
Ho razaun hirak ne’e mak benifisiariu sira balun nia dokumentus trata tinan rua ona maibé naran seidauk taka sai.
“Ami nia rekomendasaun mak ne'e, primeiru sira na’in tenke ativu hodi ba cek naran iha fatin refere”, dehan nia ba Online INDEPENDENTE iha knar fatin INSS Kaikoli, sesta ne’e (06/08).
Tuir nia, prosesu verifikasaun dadus benifisiariu idozus no invalides hahú husi aldeia ba suku no ba postu administrativu. Nune’e ba munispiu hafoin lori mai iha nivel nasional.
Nune’e, husu ba benifisiariu sira tenki konfirma sira nia dokumentus iha nivel munisipiu to’o ona mai iha nivel nasional ka seidauk.
Iha sorin seluk Xefe Suku Foho Ai-Liku, Postu Administrativu Hato-udo Munisipiu Ainaru, Deonato de Araújo Laet, hatete, iha suku refere iha benifisiariu na’in 60 ne’ebé rezista iha tinan 2019-2021, prekupa tanba seidauk simu simu sira nia direitu.
Tuir nia katak, benifisiariu na’in 60 ne’ebé submete mai iha INSS, na’in 30 la aprovadu no pendente hela laiha justifikasaun.
Asistente Editor: Saturnina da Costa
