Situasaun ekonomia obriga, Idozu ida, ho naran Jorje da Silva (83), hela iha suku Manleuana, Postu Administrativu Dom Aleixo, Munisipiu Dili, tuir lolos nia la merese ona atu buka osan, maibé ho situasaun ne’ebé nia hasoru, obriga duni nia tenki buka osan, liu husi faan bua-maran.
Dader hader mai, tenki la’o ona husi Manleuana mai to’o iha merkadu Kampung Baru Komoro.
Idozu ne’e senti kolen, tanba nia otas mós aumenta ba bebeik ona, maibé obriga tenki lao nafatin.
Nia dehan, durante fulan ida nia laran ona, nia la tur hakmatek iha uma, no loron-loron iha dader madrugada nia hader mai husi toba fatin, komesa foti bua-maran sai husi uma manleu lao to’o mai iha merkadu Kampung Baru hodi faan.
Nune’e, bele hetan netik osan uituan, hodi sosa fós no atu ajuda beioan sira nia estudu ba futuru aban bairua nian.
Maske nia senti kolen, maibé nia lalakon esperansa atu nafatin tur hodi hein ema sosa nia sasan ne’e.
"Ha’u faan bua maran ne'e durante fulan ida ho balun ona, ha’u sai husi uma iha dader, la’o tuir dalan to’o mai merkadu Kampung Baru, loron ida ema sosa barak liu mak dolar amerikanu $3 no dala ruma tun ba $1 deit, hanesan ne’e to’o lokraik ha’u fila-fali ona,", dehan nia ba Online INDEPENDENTE, iha Merkadu Kampung Baru, Komoro, segunda ne’e (23/05).
Idozu ne’e haktuir, nia iha oan mane na’in rua, oan mane ikus agora dadauk hela iha Munisipiu Ermera, no oan mane bo’ot hela iha Manleuana ho nia.
“Oan mane ne'ebé ha’u hela hamutuk ne'e oan primeiru, loron-loron nia servisu mak suru raihenek iha mota laran, no nia oan iha na’in lima balun tama ona Sekundariu no balun foin pre-sekundariu no mós foin primaria,”nia esplika.
Nia akresenta, ninia kaben husi hela ona mundu ne’e iha tempo indonezia.
Tanba ne’e, faluk ho oan mane bo’ot, hotu-hotu esforsu buka osan hodi sustenta ba uma-laran no beioan sira nia futuru.