Angela Freitas hamutuk ho Antonio Aitahan Matak nu’udar ema ne’ebé durante ne’e kontra maka’as lideransa atual, hahú husi Prezidente Repúblika Lú Olo, Primeiru Ministru Taur Matan Ruak, to’o Xefe Estadu Maior Falintil Forsa Defeza Timor-Leste (F-FDTL) Maijor Jeneral Lere Anan Timur.

Ho razaun atu defende justisa no konstituisaun RDTL, Angela ho nia grupu hahú rekolla massa atu tuun mai kapital Dili hodi halo manifestasaun kontra PR Lú Olo. Grupu ne’e mós prepara petisaun ne’ebé fó ultimatu ba PR Lú Olo atu rezigna an iha semana ida nia laran.

Iha 16 Jullu 2020, hafoin husu autorizasaun husi PNTL hodi konsentra massa iha sede nasional RNDJ-KRDTL, Bairo Formoza, reprezentante RNDJ-KRDTL, Antonio Aitahan Matak informa, iha 17 Jullu, massa sei konsentra hamutuk iha sede nasional RNDJ-KRDTL hodi hato’o sira-nia opiniaun ba Angela atu lori ba PR Lú Olo.

Massa hirak ne’ebé sei halibur-malu iha Formoza, Aitahan Matak dehan, la’os membru Unisma Ativista Pro-RDTL, maibé sidadaun sira ne’ebé vota ba FRETILIN no ba CNRT, ne’ebé la konkorda ho governu konstitusional daualu.

Massa ne’ebé tuir RNDJ-KRDTL sei halibur-malu iha Bairo Formoza kuaze rihun resin, maibé realidade, iha 17 Jullu, ema la to’o 50 mak marka prezensa.

Iha altura ne’ebá, Angela deskonfia, iha grupu balun ne’ebé aproveita situasaun hodi halo konfuzaun ba massa atu labele partisipa iha asaun konsentrasaun ba massa iha sede nasionál RNDJK-RDTL.

“Horseik (16 Jullu) ami hato’o surat ba autoridade, polisia, atu halo de’it konsentrasaun massa maibé informasaun sai mai runggu-rangga fali, dehan katak polisia sira la aoutoriza. See mak politiza situasaun ne’e? Ami hato’o ami-nia surat ba polisia ne’e laos atu halo demostrasaun, iha ema balun ne’ebé aproveita situasaun ne’e ba koalia tiha fali ami-nia asaun ne’e,” Angela dehan.

Hafoin ida ne’e, Angela hatete katak, ekipa RNDJ-KRDTL kontinua halibur massa iha munisipiu 12, inklui RAEOA, no mosu fali ‘promesa’ ba data foun atu hatama petisaun kontra PR Lú Olo. Tuir ‘promesa’ ne’e, RNDJ-KRDTL sei konsentra massa iha Tasi Tolu, Bekussi, no Bairro Formoza iha 28 Agostu 2020, hafoin marsa no ba konsentra hamutuk iha palasiu prezidensial, Bairro-pite.

Maibé, hafoin hasoru-malu ho PNTL, ikus mai, mosu mudansa ba loron manifestasaun, no desizaun ikus, muda ba 4 Setembru no massa sei konsentra de’it iha Tasi Tolu.

Iha 1 Setembru, mosu ona konkordansia entre grupu RNDJ-KRDTL ho PNTL kona-ba data manifestasaun, no maske membru F-FDTL halo movimentu iha area Bairo Formoza no deskonfia serku sede nasional RNDJ-KRDTL ne’ebé mós nu’udar rezidensia Angela, maibé Angela ho firme hatete katak, sira sei kontinua halo asaun iha loron ne’ebé determina ona.

Maibé, iha 2 Setembru, hafoin hasoru-malu ho Komando PNTL, Angela deklara kansela manifestasaun ne’ebé sei halo aban, 4 Setembru.

Portavoz Komando Jeral PNTL superintendente xefe Arnaldo Araujo hatete, grupu RNDJ-KRDTL kansela ona sira-nia asaun pasifiku.

“Ohin marka tan prezensa señora Angela ho nia grupu iha ne’e (koalia) kona-ba sira-nia planu atu halo demostrasaun, maibé tanba kestaun seguransa rai laran, tanba ne’e sira rasik adia fali iha futuru,” dehan Arnaldo, iha kuartel jeral PNTL Kaikoli, Dili, Kuarta (02/09).

Portavoz ne’e dehan, RNDJ-KRDTL mak deside kansela sira-nia asaun tanba sira-nia manifestante seidauk prontu atu halo manifestasaun.

“Bainhira mak sira atu halo fali (asaun), sira sei hasoru fali PNTL, tanba ne’e iha dia 4 Setembru sei laiha demostrasaun, tanba sira rasik mak kansela, laos ami mak kansela, tanba de’it sira-nia manifestante seidauk prontu atu halo manifestasaun,” dehan portavoz PNTL ne’e.

Angela la hetan autorizasaun husi PNTL atu halo intervista ho jornalista sira iha Kuartel Jeral, no tenke fila ba sede nasional RNDJ-KRDTL hodi hato’o deklarasaun.

Iha ninia deklarasaun, Angela hatete, RNDJ-KRDTL kansela manifestasaun tanba TL komesa aplika ditadura militar.

“Ami deside kansela manifestasaun tanba iha loron 1 Setembru ita-nia rai hahú implementa ditadura, tanba F-FDTL halo fali serbisu PNTL, nune’e halo membru RDNJ-KRDTL iha munisipiu 12 inklui RAEOA kestiona maka’as tebes,” dehan nia.

Tuir nia, movimentu membru F-FDTL iha 1 Setembru la’os de’it iha Bairo Formoza, maibé mós iha Tasi Tolu ne’ebé halo membru RNDJ-KRDTL ne’ebé instala tenda ba massa husi munisipiu sira tauk no deside retira.