Ramos Horta ne’ebé iha eleisaun prezidensial tinan ne’e hetan fiar husi maioria povu atu okupa hikas kadeira Xefe Estadu iha palasiu Prezidente Repúblika, Nicolau Lobato, hasai promesa atu hetan paradeiru eroi ne’e durante nia mandatu.

"Importante ba ha'u tenke hetan paradeiru restu mortais Nicolau Lobato, iha ha'u-nia mandatu ne'e sei haree no ko'alia familia Nicolau Lobato ho autoridade sira Indonézia atu ita taka kapitulu ida ne'e, livru ida ne'e iha istória Timor ho Indonezia, atu bele hakoi restu mortais ne'ebé família, estadu deside," dehan Horta hafoin partisipa inaugurasaun monumentu memorial primeiru governu 1975 iha Palasiu Nobre Lahane, Kinta (19/05).

Nia dehan, estadu la haluha Nicolau Lobato dezde nia mate to’o restaurasaun independensia.

"Maibé nia ruin laiha, ne'e mak sei haree, ha'u-nia preokupasaun ba oin. Posivel, la'ós diplomásia fraku ka la'ós vontade laiha,” dehan nia.

Iha fatin hanesan, família Saudozu Nicolau Lobato, Rogeiro Lobato hatete, nu’udar familia sentre triste tanba to’o ohin loron seidauk hatene paradeiru husi Nicolau Lobato.

Maske nune’e, Rogerio dehan, ida ne’e la depende de'it ba vontade estadu Timor-Leste nian, maibé depende mós ba vontade husi Indonezia.

“Ha'u hatene katak husi Timor-Leste sempre halo esforsu, governu sira uluk sempre halo esforsu, maibé ita independente ona estadu rua, Timor-Leste ho Indonézia, iha relasaun sira mak bele ko'alia atu iha kooperasaun hetan Nicolau Lobato nia ruin ita bele hakoi nia restu mortais ho dignidade, onra," katak nia.