Notisia triste loos eis-Primeiru Ministru Japaun ne'ebé Xefe Estadu koñese uluk hasoru nia iha Japaun, Primeiru Ministru, Taur Matan Ruak, mós hasoru nia, ema ne'ebé ko'alia nia Embaixadór Japaun atual iha Dili ne'e koñese Primeiru Ministru no nia ne'e di'ak.
Nia hatete, eis Primeiru Ministru Shinzo Abe sempre halo pergunta kona-ba Timor, nia tuur ho embaixadór hakarak rona. Ema ida ne'ebé di'ak, horsehik hetan tiru, lori ba iha ospital la konsege salva.
"Ita hotu-hotu reza ba nia no ba povu Japaun ne'ebé sira sokadu loos tanba iha Japaun buat ida ne'e nunka akontese," dehan Prezidente Repúblika José Ramos Horta liu husi diálogu komunitáriu ho tema dalan ba dame iha Munisípiu Ermera, Sábadu (9/7).
Nia mós haktuir, iha rai seluk konflitu mós barak tebe-tebes, Ukránia ho Rusia halo invazaun konflitu boot iha ne'eba, Siria, Afganistaun, labele permite iha Timor konflitu ruma mosu, Timor iha responsabilidade ba povu, atu mantein Timor nu'udar rai ida dame.
Molok ne'e, Primeiru Ministru Taur Matan Ruak hato'o solidariedade ba familia no povu Japaun ne'ebélakon ona eis Primeiru Ministru Shinzo Abe, tanba hetan tiru bainhira hala'o Kompañia iha sidade Nara Japaun.
"Primeiru Ministru sente sokadu ho notísia kona-ba falesimentu eis Primeiru Ministru Japaun, Shinzo Abe ne'ebé hetan tiru ohin iha sidade Nara, Japaun bainhira nia hala'o hela kampañia. Xefe Governu hato'o nia profundu sentidas kondolensiais ba familia matebian eis Primeiru Ministru Shinzo Abe no nia solidariedade ba povu no Governu Japaun ba insidente horivell ida ne'e,” dehan PM Taur.
