"Emerjénsia iha problema ba stock out ai-moruk ne'ebé importante mak hanesan Steptrokinase. Sei fó impaktu ba ita nia pasiente sira ne'ebé ho moras fuan," Xefe Departamentu Ermerjénsia HNGV, Eldegar Lopes Martins hateten iha sala emerjensia, Segunda (05/06/2023).
HNGV esforsu nafatin hodi buka solusaun atu stock out ai-moruk ne'e bele rezolvidu nune’e fó tratamentu ba pasiente sira.
“Ai-moruk Steptrokinase ne'e importante tebes liu-liu ba pasiente sira ne’ebé mai ho moras fuan,” nia hateten.
Diretór Ezekutivu Interinu SAMES, Octavio Fernandes hateten, SAMES hahú halo komunikasaun ho kompañia fornesedór sira atu rezolve situasaun refere.
"Ai-moruk Steptrokinase foin lalais stock iha maibé semana kotuk liubá stock out tanba data expire iha fulan Maiu. Entaun ita labele halo atendimentu, maibé semana ida-ne'e ami halo ona kontaktu ho fornesedór sira ne'ebé mak fornese mai Timor-Leste," nia hateten.
Espera semana ne'e nia laran fornesedór sira bele fornese ona atu nune'e rezolve problema ne'ebé HNGV enfrenta, tanba agora iha hela faze komunikasaun atu kompañia sira bele importasaun ba ai-moruk refere.
Ai-moruk iha SAMES 19% Stock Out
Tinan ne'e, aimoruk iha Servisu Autonomu Medikamentu no Ekipamentu Saúde (SAMES) 19% mak Stock Out no 81% mak sei disponivel.
Diretór ezekutivu Interinu SAMES, Octavio Fernandes hateten, ai-moruk ne'ebé mak disponivel mak hanesan Vital 85% no stock out 15%, Essensial stock disponivel 77%, stock out 23% no Nessesariu 83% mak disponiv no 17% mak stock out.
“Situasaun stock ai-moruk jerál iha armazen sentrál SAMES agora daudaun stock ne'ebé disponivel ho 81 % no stock out ai-moruk mak 19%," nia hateten iha Kampung-Alor, Segunda (05/06/2023).
Ai-moruk ampiciline mós stock out no mós ai-moruk espesilista balun maibé SAMES esforsu makaas hodi buka solusaun.
"Ita halo ona konfirmasaun ho kompañia ne'ebé mak halo distribuisaun no semana ida sira bele fornese ona ai-moruk espera semana ida-ne'e bele rezolve ai-moruk ne'ebé mak stock out," nia dehan.
Kompañia ne'ebé mak SAMES halo kontratu hamutuk 27, tuir lei katak bainhira asina ona kontratu fó tempu fulan tolu másimu fulan neen mak suplay ai-moruk mai Timor-Leste.
Kada tinan Governu liu hosi Ministériu Saúde hasoru dezafiu boot liu-liu stock ai-moruk liu-liu iha fasilidade saúde, maibe ko'alia kona-ba stock out Governu tenke investe orsamentu atu nune'e saúde labele enfrenta problema liu-liu HNGV no Hospital Referral sira bele atende pasiente ho dignu.
Kuandu aprova osan ho valór ne'ebé kiik entaun fahe ba Munisípiu 13 ne'e la sufisiente, presiza halo jestaun oinsá para ai-moruk iha HNGV, Sentru Saúde no Hospital Referral sira tenke sufisiente hodi halo atendimentu ba pasiente sira.
Orsamentu ne'ebé aloka mai SAMES purvolta millaun $15, maibé SAMES hakarak osan ne'ebé Governu aloka ona labele ko'a tan atu nune'e bele sosa medikamentu ba tinan ida nia laran.
