Tuir Portavoz Estudante Siensia Sosias UNTL, Zebedeo Montero Pinto, hatete, bainhira Governu aprova rezolusaun governu numeru 15/2021 kona-ba serka sanitaria no konfinamentu obrigatoriu hodi limita movimentu no hela iha uma.

“Ami husi estudante Universidade Timor-Lorosa’e fakuldade siensia sosias, hakarak husu ba Governu atu altera rezolusaun governu numeru 15/2021 ne’e kona ba serka sanitaria no konfiamentu obrigatoriu,”dehan nia liu husi konferensia ba imprensa, iha UNTL-Lama (30/03).

Nia hatutan, ho situasaun ne’e komunidade sira halerik ba rendementu menus iha tempu serka sanitaria hodi responde ba nesesariu uma laran no mós negosiante sira lakon rendementu kauza husi produtu lokal sira komesa dodok tanba labele asesu ba merkadu

Trabalhador sira mós la servisu iha tempu EE tanba kauza ajensia privadu sira taka no trabalhador lakon direitu asesu ba servisu.

Nune’e estudante sira husu atu governu Timor-Leste presiza fó liberdade ba sidadaun sira bele halo movimentu maibé tenki tuir protokolu Organizasaun Saúde Mundiál no Ministériu Saúde nian.

“Tanba durante implementa serka sanitaria no konfinamentu obrigatoriu halo ami estudante inklui mós trabalhador no vendedor sira sai vitima kauza husi atividade diaria paralizadu,”nia dehan.

Molok ne’e vendedora ho naran, Elisabet Maria Rodriges hatete, iha situasaun serka sanitaria nia laran sira nia produtu la folin tanba komprador menus no kada loron ida sira nia rendementu hetan deit $ 10 to’o $ 15 ne’e la nesesita uma laran.

Entretantu, Governu liu husi Konsellu Ministru deside ona atu apoiu trabalhador no kompaña sira liu husi politika estabilizasaun ekonomika.

Tuir Ministru Prezidensia Konsellu Ministru Fidelis Leite Magalhãens hatete, Konsellu Ministru (KM) propoin fó subsidiu ba estudante ensinu superior sira iha situasaun serka sanitaria tanba sira labele hala’o ensinu prezensial maximu dolar amerikanu $150.

Jornalista: Saturnina da Costa

Editor: Jose Sarito Amaral