Ne’e duni, tuir Manuel Tilman, Jurista timoroan hateten, dalan uniku bainhira partidu sira iha Uma Fukun PN bele halo maka tenke brani foti risku, hodi vota kontra Orsamentu Jerál Estadu (OJE) tinan fiskál 2020.
Liuliu ba partidu CNRT, ne’ebé iha audiénsia debate orsamentu sempre hatudu pozisaun ‘antipatia’ ba polítika ezekusaun OJE 2019 nian ne’ebé la tuir kompromisu no polítika AMP nian.
“Lei fó dalan hodi hakat ba eleisaun antesipada bainhira CNRT vota kontra dala rua Orsamentu Jerál Estadu 2020”, dehan nia, iha knaar fatin, Praia Kokeiros, horisehik.
Nia hatutan, Konstituisaun fó dalan ba eleisaun antesipada liuhusi vota kontra OJE, maibé tenke haree iha aspetu jurídiku ba pontu importante rua hanesan ezekusaun OJE 2019 iha diskriminasaun ba reseita no deskrisaun ba despeza ne’ebé la korresponde ba nesesidade povu.
“Ha’u konkorda ho CNRT karik vota kontra OJE 2020, tanba ezekusaun OJE 2019 la responde ba kompromisu eleitorál”, tenik Tilman.
Nia esplika, OJE 2020 bazeia ba não deskrisaun ba reseita tuir programa dezenvolvimentu no tuir planu estratéjiku 2030 ho despeja ne’ebé boot laiha justifikasaun.
Tuir nia, ambisiozu hodi hakarak ukun maibé ho de'it deputadu na’in ualu (8) no laiha podér atu manda, entaun bele hakat ba eleisaun nune’e povu mak determina se mak manan eleisaun iha obrigasaun atu ukun.
