Vise Diretór Asosiasaun HAK Sisto dos Santos dehan, hanesan organizasaun direitus umanus, HAK husu ba Aitahan Matak ne’ebé sente la seguru atu hato’o keixa ba instituisaun kompetente sira.
Sisto hato’o lia hirak ne’e relasiona ho deklarasaun Aitahan Matak ne’ebé hatete, daudauk ne’e nia iha ameasa nia laran.
Vise Diretór HAK ne’e hatutan, se Aitahan Matak sente la seguru bele hato’o keixa ba PDHJ kona-ba see mak halo ameasa ba nia.
Se Aitahan Matak sente la seguru tanba prezensa membru F-FDTL iha rezidensia Angela, tuir Sisto, la’os garantia ida katak F-FDTL mak fó hela presaun ba nia.
Tanba, bazeia ba deklarasaun ne’ebé Aitahan Matak rasik hasai iha 2 Setembru 2020 katak nia halo hola parte ona iha grupu RNDJ-KRDTL.
Nia hatutan, bainhira ema ida hakarak partisipa iha manifestasaun, ema ne’e mai ho ninia konsensia no ho voluntariu, maibé molok envolve, ema ne’e tenke kompriende, apar ho situasaun no aseita mós ho issu ida ne’ebé sei dudu ka foti ba oin.
“Agora maun Antonio Aitahan Matak sente bainhira iha dalan klaran mak buat sira ne’e la tuir saida mak uluk sira kaer metin hela, nia bele iha direitu atu retira ka atu la apoiu, atu kontra fali, ne’e maun Antonio Aitahan Matak nia direitu tomak.”
“Maibé, agora ho ida ne’e mak nia sente la seguru, hanesan organizasaun Direitus Umanus, HAK, apelu ba maun Antonio Aitahan Matak no ba grupu sira ne’ebé sente la seguru ona iha sira-nia hela fatin, favor ba keixa iha PDHJ,” dehan Sisto iha nia knar fatin, Farol, Tersa (08/09).
Sisto hatutan, karik Aitahan Matak seidauk hatene prosesu atu hato’o keixa ba PDHJ, bele hakat ba edifisiu HAK hodi husu apoiu.
“Se seidauk hatene karik mai iha HAK mak akompaña nia ba PDHJ,” dehan nia.
Aleinde hato’o keixa ba PDHJ, HAK mós sujere Aitahan Matak hato’o keixa ba Polisia Nasionál Timor-Leste, no ba F-FDTL karik sira ne’ebé fó ameasa mai husi instituisaun defeza ne’e.
“Se kuandu forsa mak hasoru nia, keixa mós ba ita-nia Jenerál, ba Ministru Defeza, keixa iha ne’eba, ita nia maun sira ne’e ita-nia ema, maibé agora nia la seguru ne’e husi see?, maun Antonio Aitahan Matak la seguru husi ita-nia instituisaun estadu ba iha PDHJ, se labele liu ona mai iha HAK, ita halo apelu, alarma ba ONU,” dehan nia.
