Molok ne’e, gravasaun lian ne’ebé deskonfia nu’udar lian husi Antonio Aitahan Matak ne’ebé públika iha media sosial temi mós envolvimentu Amu Lulik sira iha grupu RNDJ-KRDTL.
Bainhira jornalista sira konfirma asuntu ne’e, Amu Maubere ho nakloke hatan katak igreja nia pozisaun tuir lia loos, tanba ne’e bainhira grupu RNDJ-KRDTL hakarak buka lia loos igreja prontu atu fó apoiu.
“Ami-nia posizaun ne’e, posizaun ne’ebé mak tuir lia loos nian, Angéla Freitas ka see de’it mak ko’alia kona-ba lia loos, ami apoiu nafatin ema sira ne’ebé buka lia loos, tanba ne’e Angéla sira buka lia loos, keta buat sira ne’e keta loos karik, ne’e la’os ha’u de’it, mais igreja tomak, ami nian serbisu mak ida ne’e, bainhira povu sente hakmatek ami fó parabéns,” dehan Amu Maubere ba jornalista sira bainhira partisipa seminariu iha Sentru Nasional Chega (SNC) Balide, Dili, Tersa (08/09).
Amu Maubere afirma, bainhira povu sente hakmatek igreja tenke fó apoiu, maibé se halo povu sente la hakmatek, atu hasoru see de’it igreja tenke book an.
“See de’it mak buka lia loos ami apoiu, se agora Angéla Freitas buka lia loos ami mós iha kotuk, ami la’os tama ba atu haruka, maibé ami kari fini, nia hanesan ema sarani di’ak, nia dehan ha’u tenke halo ida ne’e, tenke apoiu,” dehan nia.
Maske apoiu, maibé Amu Maubere hatete, Igreja la envolve iha asaun manifestasaun kontra Prezidente Repúblika Francisco Guterres Lú Olo, tanba igreja la envolve iha asaun polítika pratika, tanba ne’e la’os igreja mak atu ba hatun PR no hasa’e PR, maibé igreja hanorin povu atu hili PR ida ne’ebé di’ak, hili governu ida ne’ebe di’ak.
“Ami ne’e hanesan ema ne’ebe hanorin, ami hanorin lia loos, hanorin idaidak hatene halo buat ne’ebé ho nia konsensia no ami ko’alia apoiu ka la apoiu, maibé labele tama iha politika pratika, ami hanorin ema hotu-hotu atu halo buat ne’ebé loos, agora see mak halo, nia responsabiliza ba nian an,” dehan nia.
Amu ne’e hatete, grupu RNDJ-KRDTRL bele uza nia naran ba lia loos, maibé la’os hatuur nia iha estrutura grupu nian.
“Grupu RNDJ-KRDTRL bele uza ha’u-nia naran, maibé ba lia loos, la’os ba lia bosok, agora dehan fali ha’u envolve iha estrutura Angéla Freitas ida ne’e ha’u rezeita, ha’u la envolve, tanba ne’e ha’u padre ba ema hotu-hotu,” katak nia.
Konsideira Lere Aplika Ditadura
Entretantu, Amu Maubere konsidera Xefe Estadu Maior Jeneral Falintil Forsa Defeza Timor-Leste (F-FDTL) Maijor Jenerál Lere Anan Timur aplika ditadura iha Timor-Leste, tanba bandu ema atu espresa ninia hanoin.
“Ema sivil ida nia hakilar, o lori forsa mai hale’u nia uma, ne’e ditadura ka la’e, o ko’alia dehan ‘ha’u sei ka’er ema sira ne’e, futu ema sira ne’e, ha’u sei sama belar António Aitahan Matak’, no iha dia seguente o lori o nia forsa mai hamrik ho kilat iha ema nia oin, ema atu dehan katak o atu mai vizita nia ka mai fó parabéns ba nia, o la’os mai ameasa nian? ema hotu-hotu matan nakloke hela,” dehan Amu Maubere.
Nia afirma, atetude ne’ebé mak Lere halo hodi orienta membru militar serku sede nasional RNDJ-KRDTL iha Bairo Formoza iha 1 Setembru 2020, ne’e hanesan ditadura no oho demokrasia.
“Bainhira sidadaun ida koalia, maibé ba taka tiha nia ibun, ne’e laiha demokrasia, ne’e oho demokrasia,” katak nia.
Tanba ne’e, Amu Maubere husu atu labele repete tan saida mak nasaun Indonézia halo ba povu Timor-Leste durante tinan 24.
“La’os o mak detentor, o mak kaer de’it lia loos, o mak hatene mesak de’it, laiha, ema mós hotu-hotu oras ne’e matenek barak no mundu mós loke hela nia matan,” dehan nia.
Tuir nia, F-FDTL nia kna’ar mak atu defende povu husi ameasa husi li’ur, maibé bainhira F-FDTL mak mosu fali iha povu nian leet no lori kilat ameasa, ne’e la tuir ona saida mak konstituisaun hatete.
