Planu ne’e sei realiza ho kondisaun ida de’it bainhira maioria populasaun iha kapital Dili simu ona vasinasaun.
Diretor Klinika HNGV, Flavio Brandão hatete, bainhira maioria populasaun simu ona vasinasaun sei loke fali dalan foun ba HNGV atu normaliza fali HNGV.
“Normalmente bainhira sidadaun sira hetan ona vasina Covid-19, entau ita sei halo de’it swab ba sira ne’ebé mak suspeita persiza halo duni, tanba indikasaun ne’ebé mak médiku sira husu ita mós bele uza ona rapit test ne’ebé mak ema idaidak bele halo ba nia aan no la presiza teste PCR,” dehan nia iha HNGV, Segunda (28/06).
Nia hatete, HNGV muda tuir evolusaun moras sira ne’ebé mak iha no tuir karater sidadaun nian, tanba durante periodu Covid-19, utente ne’ebé marka prezensa hahú menus tanba ta’uk, maibé ba dadauk ne’e situasaun hahú normal fila fali.
“Ita hotu hatene ba dadauk iha sala internamentu sira hotu ne’e kuaze pursentu 80 kama sira pasiente sira utiliza hotu, ida ne’e signifika katak ita atu hahú tama ba normaliza ona situasaun post-Covid-19,” nia hato’o.
Maibé, nia hatutan, ema hotu tenke hatene katak Covid-19 ne’e seidauk hotu sei evolui hela iha ema idaidak nia an no fatin hotu, entaun HNGV hotu-hotu sei kontinua atu responde tuir nesesidade.
Tuir dadus, iha 28 Juñu pasiente hamutuk 175 mak baixa iha HNGV. Husi númeru ne’e na’in 144 mai ho kondisaun ladun todan no kondisaun grave na’in 31.
“Ita haree ohin loron menus, husi kama 200 resin iha HNGV 175 mak okupa, entaun balun seidauk prense, maibé númeru ne’ebé mai iha sala emerjensia kada loron aumenta maka’as, ohin loron de’it 300 resin ba iha tenda triajen mós hamutuk hotu 303, ida ne’e ita haree iha mudansa boot,” dehan nia.
Entretantu, iha fulan rua nia laran, Abril to’o Maiu 2021, númeru pasiente ne’ebé hala’o tratamentu saúde iha HNGV menus kompara ho fulan hirak liu ba.
Tuir dadus husi HNGV, iha fulan Abril pasiente na’in 1,982 mak hala’o tratamentu iha sala emerjensia HNGV. Enkuantu, iha fulan Maiu númeru ne’e tuun uitoan ba na’in 1.952.
Maske nune’e, númeru ne’e tuun liu kompara ho fulan hirak liu ba kotuk, liu-liu molok tama ba aplikasaun Serka Sanitaria iha kapital Dili.
“Iha situasaun normal ne’e ita sempre rejista pasiente ne’ebé iha triazen emerzensia ne’e rihun 3 to’o rihun 4, maibé hahú iha fulan rua tuir malu ne’e tuun tebes,” informa Xefe Gabinete Kontrolu Kualidade no Komunikasaun Sosial HNGV Sara Maria Xavier iha nia knaar fatin, HNGV, Kinta (10/06).
Tuir nia, kauza prinsipal ne’ebé halo númeru pasiente menus iha HNGV mak protokolu HNGV ne’ebé obriga pasiente no familia pasiente atu tenke swab bainhira asesu fasilidade saúde iha ospital nasional ne’e.
“Entaun dala-ruma tanba sira ta’uk swab ne’e mak fó inpaktu ba ita-nia ospital rejista pasiente menus, maibé ha’u sente HNGV nafatin nakloke oras 24 nia laran atu simu see de’it, tanba ne’e lalika ta’uk, tanba swab ne’e hanesan prosedimentu ita tenke halo atu bele minimiza risku infeksaun ba iha pasiente sira seluk,” katak nia.
