Sesta-feira ohin (6/3), hafoin hasoru malu ho Presidente Repúblika Fransisco Guterres Lú Olo, Xanana ho oin buis, la hatudu oin hamnasa, matan taka ho oklu metan, subar an ba jornalista, no hateke liu deit ba jornalista hakat dadaun ona ba liur.
Tuir observasaun Online INDEPENDENTE, katak iha oras 09:10, Xanana Gusmão hakat nei-neik ba besik lista prezensa hodi asinatura, tuir kedas ho Prezidente KHUNTO Armanda Berta, PD Mariano Asanami Sabino, PUDD, Antonio Benevides, UDT Rudolfo Aparicio Guterres, FRENTE MUDANSA Egidio de Jesus no mós Sekretáriu Jerál Antonio da Conceicao "Kalahon".
Hafoin remata lista prezensa koligasaun sira espera hamutuk iha sala CPLP Palasiu Prezidensial kuaze oras ida ho balun hafoin koligasaun sira hakat sae ba andar leten hodi hasoru PR Lú Olo iha Salaun Koni Santa.
Xanana ho Lú Olo kaer liman ho oin ne’ebé midar. Hafoin remata oras 10:03 enkontru ne’e kuaze oras rua nia laran.
Hafoin enkontru ho PR Lù Olo, Xanana tuun mai husi andar ho oin ne’ebé la hamnasa no jornalista sira ne’ebé preparadu ona atu halo entrevista ho Xanana kona-ba rezultadu husi enkontru ne’e maibé Xanana rasik lakohi ko’alia ho media.
Entaun Xanana delega fali Sekretáriu Jeral Partidu PD, Antonio da Concencio "Kalohan" maka ko’alia fali ho media kona-ba rezultdu enkontru ho jornalista sira.
