Direitór Ezekutivu Habada, Abel Amaral hatete, ligadu ho ema hala'o peska ilegál liu-liu nasaun viziñu ne'ebé hanesan ema hotu hatene, ema mai halo peska ilegal iha tasi Timor, hanoin kestaun ida peska ilegál ne'e ema hotu sempre preokupa, estadu, komunidade, sosiédade sivil preokupa.

Maibé, problema mak investimentu ba iha asuntu marítima ne'e mak seidauk máximu, iha ona autoridade nasionál marítima, iha polísia marítima, iha naval maibé rekursu ne'ebé sira iha ne'e limitadu loos.

Nia dehan, laiha ro ida ne'ebé atu halo kontrolu ba tasi klean sira, entaun nasaun sira ne'ebé iha ro kapasidade di'ak bele tama to'o iha tasi klean, sira aproveita rikusoin iha tasi laran. Entaun iha oportunidade ida ne'e, husu autoridade marítima ninian, atu bele hato'o ba estadu oinsá mak asegura rikusoin iha tasi laran.

Alende, ida ne'e mós oinsá mak estadu bele hanoin investe mós ba peska lokál sira, nune'e oinsá mak sira bele hadia sira nia rendimentu iha Timor.

Tanba dala barak bele asegura rikusoin iha tasi, la útiliza másimu hanesan ikan,  labele hala'o atividade peska ne'e to'o iha tasi klean, só peska ne'e tasi ninin. Entaun husu ba estadu la'ós asegura de'it no soberanu de'it, maibé alende asegura ita mós bele útiliza rikusoin iha tasi ne'e oinsá fó rendimentu ba ita nia estadu no mós hadia ita nia komunidade lokál.

"Ami husu ba estadu atu investe maka'as ba iha setór marítima, naval tanba ita nia tasi luan, maibé ita nia rekursu umanus ita bele dehan iha, maibé ita nia ekipamentu hanesan ro boot ne'ebé atu halo patrollamentu ba iha tasi klaran, ita iha difikuldade," dehan Direitór Ezekutivu Habada, Abel ba jornslista sira iha nia kna'ar fatin, Tersa (06/01).

Hakarak lee notisia kompletu no notisia sira seluk tan bele asesu link e-paper INDEPENDENTE:https://digital.independente.tl, edisaun Kuarta (07/01).