Dosente UNTL, Julio Aparicio hatete, subsídiu $200 ne'e povu nia osan, tanba ne'e uma-kain hotu-hotu tenke hetan hotu.

"Ha'u dehan governu hatene de'it mak  halo programa, maibé laiha dadus uma-kain ne'ebé kompletu, ida-ne'e hanesan programa ida-ne'ebé ita ko'alia kasar karik sabraut de'it,tanba ami foin hasoru Xefe Suku Bukoli nian katak ami nia ema balun ami hetene hela, ami hatama naran iha lista, maibé haruka mai naran iha lista, maibé nia naran laiha fali, balun ne'ebé mak mate ona naran iha fali," dehan nia, kampuz UNTL, Kaikoli, Sesta (23/12).

Nia haktuir, ida-ne'e hatudu momos kapasidade Governu nian atu implementa programa ida, tanba ida-ne'e buat kiik oan ida, maibé hamosu diskriminasaun ba povu.

"Ba ha'u sira hakarak implementa subsídiu maibé la kria kondisaun no la preparadu, ikus mai halo xefe Suku no xefe aldeia sira, povu hotu moris iha presaun nia laran,atu simu osan ne'e mós sei hanoin barak, naran iha lista iha ka la'e, se laiha, entaun laiha direitu atu simu, sira halai tuun sa'e, ba xefe suku no xefe aldeia, maibé laiha solusaun, entaun ita halo terus de'it ita nia povu," Nia relata.

Nia haktuir, tanba ne'e governu implementa programa ida hanesan ne'e presiza haree didi'ak, atu nune'e labele hamosu deskontamentu populasaun ho populasaun, tanba balun simu, balun la simu.

"Di'ak liu husu Xefe Suku no xefe aldeia katak ema identidade hanesan ne'e nia ema, entaun sira iha direitu atu hetan," Nia relata.

Nia argumenta, osan ne'ebé fahe ne'e povu ni'an ne'ebé uma-kain hotu-hotu iha direitu atu hetan, nune'e Feto sira ne'ebé nia laen husik ne'e mós iha direitu.

"Ein-jerál aseita programa oitavu governu nian, maibé ninia Implementasaun mak tenke hadia, atu nune'e labele haterus povu no labele hamosu deskontamentu ba populasaun sira," nia infrorma.

Nia fundamenta, governu tenke implementa no jestaun ne'ebé mak di'ak atu nune'e uma-kain hotu-hotu tenke hetan subsídiu ida-ne'e, para povu hotu kontente iha tempu loron natál no tinan foun.

Molok ne'e, Ministru Administrasaun Estatál (MAE), Miguel Pereira de Carvalho, husu autoridade lokál atu tau konsiderasaun ba lista reklamante hodi nune'e  bele hetan direitu subsídiu  $200.

Tuir nia, iha regra ne’ebé estabelese bainhira naran laiha lista entaun benefisiáriu ne’e bele hato'o reklamasaun liu husi xefe suku no xefe aldeia, depois sei trata dadus sira-ne'e.

"Agora da-ruak nia ita bele haree katak xefe família sira númeru aumenta tan hosi tinan 2020 to’o 2022, entaun ita husu xefe suku no xefe aldeia atu simu lista reklamasaun nune’e sira bele simu sira-nia direitu," dehan nia.

Nia haktuir, Ministériu Administrasaun Estatál liu husi xefe suku no xefe aldeia sira tenta másima bele akomoda família sira-ne’ebé forma família foun entre tinan 2020 to’o 2022.

Purtantu tuir dadus, uma kain iha territóriu nasionál ho totál hamutuk 39.000 ne’ebé submete ona ba Ministériu Solidariedade Sosiál no Inkluzaub (MSSI) ho totál pagamentu millaun $7,8.