Enkuantu, iha faze tuirmai, simu ona unidade balun, ho totál ezemplár 700, ne'ebé sei distribui ba grupu prioritária sira. Nune’e, tuir faze, prevee iha tempu badak, sei mai unidade barak liután.

“Tanba ne'e, hakarak informa ba ita-boot sira katak, prosesu akizisaun kaderneta pasaporte eletróniku nian iha ona faze finál, no ita hein deit tuir faze pakote ba kaderneta ne'ebé haruka mai Timor-Leste, ho totál ne'ebé prevee ona maka iha unidade 73.840,” haktuir komunikadu ne’ebé Online INDEPENDENTE sita, kuarta (11/10/23).

Entretantu, molok ne’e, iha tinan 2015, Ministériu Justisa selebra ona kontratu ida hodi fornese unidade kaderneta Passaporte hamutuk rihun 150, ne'ebé entrega ona husi tinan 2016 too 2019.

Tan ne'e ho hanoin katak, estimasaun ba impresaun anuál kaderneta passaporte nian iha Timor-Leste mak unidade rihun 20, prevee katak stok ne'e sei garante iha tinan 2022 to’o 2023.

Iha tinan 2022, inisia ona prosesu aprovizionamentu foun ida ba akizisaun kaderneta Passaporte, prosesu ne'e labele realiza tanba difikuldade prosesuál sira.

Entretantu, iha finál tinan 2022, hafoin aeroportu loke filafali hafoin Covid-19, mosu aumentu solisitasaun ba emisaun passaporte liu média no la espera, nune'e maka hamosu fallansu iha prosesu emisaun pasaporte nian.

Nune'e, iha inísiu tinan 2023, Ministru Justisa selebra kontratu ida atu fornese unidade kaderneta Passaporte hamutuk 73.150, ne’ebé la kumpre tanba difikuldade prosesuál.

Atu solusiona situasaun ne'e, Governu Konstitusionál IX, ho desizaun Konsellu Ministrus loron 27 fulan-setembru tinan 2023, kona-ba aprovasaun atu ajuste diretu ne'ebé urjente, fó kontinuidade ba prosesu aprovizionamentu atu adjudika akizisaun ba kaderneta pasaporte eletróniku.