"Agora dadaun ne'e ita hare hela oinsa atu re-ativa fila-fali produzaun batar uut ne'ebé mak kompañia Timor Beat atu produz,”dehan Vice-Ministru Saúde (MS), Bonifacio Maukoli ba jornalista sira, hafoin partisipa seminariu ida iha Timor-Plaza, kuarta ne'e (13/04).

Nia hatutan, ba asuntu ne’e, Ministra Saúde vizita ona kompañia refere hodi haree atu bele utiliza produto lokal liu-liu batar.

Tuir nia, problema mal-nutrisaun ne'e bo'ot tebes iha Timor-Leste, tanba ne’e persija involvimentu ema hotu nian atu redus problema refere.

Enkuantu, nia dehan, Ai-han nutritivu ne'e barak maibé ema ladun tau atensaun, nune’e fó impaktu makas ba saúde labarik sira nian.

Tanba ne’e, parte pesoal saúde sira kontinua nafatin halo promosaun oinsa atu prepara aan, hodi utiliza jardin iha uma oin, atu bele kuda ai-han sira ne'ebé nutritivu hodi bele fó benefisiu ba saúde labarik sira nian.

Entretantu, Diretóra Servisu Saúde Munisipiu Dili, Agostinha Seguradu hatete, sira nafatin halo sosializasaun ba inan-aman sira, atu eskolla aihan ne’ebé ho nutrisaun diak ba oan, hodi bele prevene labarik sira ba mal-nutrisaun.