"Akordu ida-ne’e ho objetivu atu halo kontratasaun empréstimu ida ho valór besik dolar amerikanu millaun U$121, hodi halo finansiamentu ho períodu maturidade tinan 40, hodi finansia projetu fornesimentu bee iha Dili,” dehan Ministru Prezidensial Konsellu Ministrus, Fidelis Leite Magalhães, iha Palasiu Governu, kuarta ne'e (20/07).

Nia hatutan, Programa ne’e sei dezenvolve liuhusi finansiamentu ho durasaun tinan hitu no komponente tolu, ba komponente dahuluk, refere ba dezenvolvimentu infraestrutura sira abastesimentu bee nian, komponente daruak nian kona-ba hadi’a kapasidade institusionál servisu sira ba setór ida-ne’e no datoluk hadi’a jestaun projetu sira.

Nune’e, imprestimu ne’ebé Banku Mundial sei oferese, ida ne’e ba fornesimentu bee moos iha Kapital Dili, husi parte leste ne’ebé sei to’o iha Metiaut no Bekora.

Atu nune’e, iha futuru, komunidade sira iha Kapital Dili bele asesu ba bee moos ho diak.

Governante ne’e haktuir, progama ne'e atu refleta katak, bainhra atu hadia projetu bee moos no saneamentu iha Dili laran tomak, garante katak iha bee moos bele liga ba uma kain ida-idak.

"Ita garante katak, ita bele loke tornera ne'ebé mak di'ak, iha bee moos ne'ebé diak no drainajen sira ne'ebé diak, no mós fó benefisiu ba sidadaun sira iha capital,”hakotu nia.