Projetu dekretu lei ne'e, aprezenta husi Primeiru Ministru hanesan mós Ministru Interior hanesan, Taur Matan Ruak no Vise Ministru Interior Antonio Armindo.

"Ohin Konsellu Ministrus aprova dekretu Governu nian, ne'ebé aprezenta husi Ministeriu Interior kona-ba subsidiu diário alimentasaun ba ofisiál sira ne’ebé servisu iha imigrasaun," dehan Ministru Prezidensial Konsellu Ministrus, Fidelis Leite Magalhães, iha Palasiu Governu, kuarta ne'e (20/07).

Governante ne’e hatutan, ho subsidiu ne'e signifika katak, ba hirak ne'ebé servisu iha imigrasaun, sira nia subsidiu ba hahan nian sei aumenta ba dolar amerikanu $10 kada loron.

Nia esplika, Projetu dekretu Governu ida-ne’e, atu fiksa valór diáriu no konsekuentemente regula pagamentu subsídiu ida ne’e nian, hanesan prevee iha estatutu pesoál servisu migrasaun nian.

Nune’e, hodi uniformiza ho valór subsídiu alimentasaun nian ne’ebé prevee iha rejime remuneratóriu sira Forsa Defeza Seguransa nian.

Entretantu, valór diáriu husi subsídiu ne’ebé define iha diploma ida ne’e hanesan dolar amerikanu $10.