Hafoin akontese udan no anin bo’ot iha loron (28/05), ne’ebé rezulta tasi sa’e iha area pantai kelapa, Suku Bebonuk, Postu Administrativu Don Aleixo.

Nune’e, halo populasaun iha Aldeia tolu hanesan, Aldeia Metin 1,2 no 3 trauma, tanba tasi sa’e sira nia uma  no uma balun anin sobu.

Enkuantu, iha akontesementu ne’e, MAE hamutuk SEPS halo kedan intervensaun hodi evakuan populasaun hamutuk, 441 ba fatin evakuasaun iha eskola Ensino Bázika Filial no-2 Bebonuk.

Familia vitima, kompostu husi, Xefe familia 61, iha mane na’in 157, feto  142 inklui inan fó susu oan 17, inan isin rua 11 no bebe idade 0-11 iha na’in 10 no mós bebe idade 1-5 na’in 43. 

Tanba ne’e, Ministru Administrasaun Estatal, Miguel Pereira de Carvallho informa, familia vitima ne’ebé rezulta husi tasi sa’e iha Pantai Kelapa foin lalais iha loron (28/05), agora dadauk reintegra ona ba sira nia hela fatin.

“Sira ne’ebé hela iha EBF-Bebonuk fila ona ba sira nia hela fatin,”dehan nia ba Online INDEPENDENTE, iha salaun Laline-CNE Colmera Dili, kinta (01/07).

Nia hatutan, Governu liu husi Sekretaria Estadu Protesaun Sivil (SEPS) mós fó ona asistensia ba sira, hodi fila ba sira nia hela fatin.

Apoiu ne’ebé fó ba familia vitima mak sira hanesan,  fós, supermie, mina, lona, no mós material kontrusaun sira. 

 Molok ne’e, Diretór Jéral Desenvolvimento Rural, Rosito Guterres hatete,  hafoin akontesementu, MAE hamutuk ho Adjunto Prezidente Autoridade Munisípiu Dili no mós ekipa responsavel operasionais SEPS, hodi kordena ho Xefe Suku no Xefe Aldeia, halo kedas intervensaun no tun direita ba terenu hodi evakua komunidade afeitadu sira ba fatin evakuasaun eskola Ensino Básico Filial No-02 Bebonuk iha oras tuku 17:00.

“Governu nian obrigasaun premeiru mak alerta hodi garantia ita bo’ot sira ses husi fatin risku dezastre, no hahú ohin ba oin, Sekretáriu Estadu Protesaun Sivil, MSSI no MAE kontinua koordena hodi responde ho medidas emerjénsia ba loron-tolu ,hodi oferese ai-han tasak,”dehan nia.

Asistente Editor: Saturnina da Costa