Eis-Sekretáriu Estadu Defeza, Júlio Tomás Pinto hateten, revizaun ne’e presiza halo hodi bele halo atualizasaun bazeia ba situasaun rai laran.
“Uluk ita dehan forsa nia kuantidade ne’e to’o hira? Depois haree fali realidade ne’e oinsá, tenke haree mós partisipasaun polítika internasionál ba F-FDTL nia ne’e oinsá”, dehan nia, iha Parlamentu Nasionál, horisehik.
Tuir nia, antes ne’e mós rekomendasaun ne'ebé halo husi Sekretaria Estadu Fortalesimentu Institusionál (SEFI) halo diagnostika fó rekomendasaun katak ministériu balun to’o agora seidauk iha planu estratéjiku ministeriál nian para atu operasionaliza planu estratéjiku ministeriál ne’e.
Nia hatutan, iha diagnostika nasionál ne’e, ministériu defeza mak iha planu estratéjiku 2020 ne'ebé sai hanesan mata-dalan ba dezenvolvimentu F-FDTL, tanba ne’e hanesan pasu ida ba forsa defeza nian.
Júlio dehan, ba dezenvolvimentu forsa nian, progresu barak ne'ebé atinje dezde husi tinan 2007 to’o ohin loron. Progresu sira ne’e sei sustentavel kuandu vizaun atu dezenvolve forsa ne’e tenke hanesan liu-liu ba lideransa sira ne'ebé kaer xave forsa defeza, liu-liu ba primeiru ministru, ministru defeza no lider F-FDTL servisu hamutuk atu tuir duni planu 2020 atu sira bele sai duni forsa regulár ne'ebé profisionál.
“Saida mak akontese durante ne’e ha'u hanoin dezde mandatu primeiru governu mai to’o VI governu konstitusionál hotu-hotu esforsu aan atu bele dezenvolve forsa armada ne’e di'ak iha nivel polítiku, liu-liu ministériu ka governu ne’e tenke esforsu másimu”, dehan Eis SED.
Nia hatutan, dezenvolvimentu forsa armada la’o di'ak iha nivel operasionál ne’e tenke halo sinkronizasaun entre parte forsa armada no polítiku sira tenke ida de'it, nune’e bele sai lian, vizaun no objetivu ida.
Júlio Pinto hateten, hakarak atu sai forsa armada ne’e profisionál di'ak liután, labele ko’alia polítika barak liu mas tenke konsentra hodi barak kona-ba polítika operasionál.
Tanba ne’e, ministériu tenke hamutuk ho lider forsa armada atu kontinua halo kontrolu ba forsa sira iha kraik, tanba forsa armada ne’e kuandu komandu iha kraik halo kontrolu fraku ne’e dixiplina mós laiha ona no kontrolu ba membru sira iha kraik mós la la’o.
Nia reforsa, ohin loron F-FDTL ne’e nia la’o duni ona tuir ninia dalan tanba husi elementu hanesan F-FDTL no órgaun soberania sira dala ruma sira nia linguajen la hanesan, maibé vizaun ne’e hanesan tanba ne’e prosesu dezenvolvimentu ne’e la’o ba oin.
Nia akresenta katak, membru F-FDTL foun sira ne’e tenke orgullu katak sira iha lideransa ne'ebé mai husi FALINTIL hanesan Prezidente Repúblika Francisco Guterres ‘Lú-Olo’. Espíritu FALINTIL sei sai hanesan mata-dalan ba dezenvolvimentu F-FDTL.
Ne’e mensajen ida katak labele haluha istória, tanba embriaun F-FDTL ne’e mai husi FALINTIL, tanba ne’e ko’alia kona-ba espíritu FALINTIL ne’e nia filozofia ne’e povu, tanba forsa armada labele sai fali inimigu ba povu sira, tenke fó defeza ba povu atu dezenvolvimentu sira ne’e tuir duni koridor planu estratéjia 2020.
Ne’e duni, asuntu ne'ebé importante Aniversáriu FALENTIL ba dala 42 ne’e relembra fila fali autór importante sira ne'ebé envolve-aan iha forsa 2020 hodi hasai ba públiku iha 2005-2006 ne'ebé hasai ona planu 2020, maibé la konsege implementa tanba sei iha krize nia laran. Maibé, atu implementa didi'ak ne’e iha 2010 ne’e signifika katak, lakon tempu períodu ida tanba ne’e implementasaun ne’e la’o tarde tanba tenke atualiza.
