“Nune’e, bandu sirkulasaun ema nian entre Munisípiu sira no sirkunskrisaun administrativa sira seluk, exetu iha kazu hirak ne’ebé iha fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian,”dehan Ministru Prezidensia Konsellu Ministru Fidelis Leite Magalhães, iha Ministeriu Finansas Aitarak-Laran, sengunda ohin (31/05).
Entretantu, ba Munisípiu Baucau no Vikeke renova hikas serka sanitaria ba loron 7 deit.
“Iha Munisipiu rua ne’e ita renova tanba situasaun komesa diak ona kontratiu ho Munisipiu Bobonaro, Covalima no Dili, ne’ebé numeru aumenta tan,” tenik nia.
Tanba ne’e, Governu husu ba sidadun sira iha Munisipiu Covalima, Bobonaro no Dili atu halo esforsu hotu hodi hakotu kadeia transmisaun virus nian atu bele normaliza fali iha tempu badak.
Aliende, iha Munisípiu Dili mós mantein nafatin impozisaun konfinamentu domisiliáriu jerál ba ema hotu-hotu ne’ebé hela ka oras ne’e daudaun iha hela Munisípiu Dili, exetu tanba razaun sira ne’ebé uluk define ona, liuliu tanba razaun sira saúde nian, serbisu no ba asesu sasán no servisu sira ne’ebé sai hanesan nesesidade bázika no atu partisipa iha selebrasaun relijiozu no eventu kultu sira seluk.
“Rejista de’it alterasaun ida, ho autorizasaun ba sidadaun sira bele auzenta husi sira-nia rezidénsia hodi realiza resenseamentu eleitorál,”nia informa.
Enkuantu, tuir aprezentasaun husi SIJK ba membru Konsellu Ministrus katak, iha loron 14 ikus ne’e, husi loron 17 to’o loron 30 fulan-Maiu, rejista ona kazu infetadu SARS-CoV-2 iha terittoriu tomak ho totál hamutuk 2.432. Husi númeru ne’e hamutuk kazu detetadu 2.043 rejista iha Dili, iha Bobonaru kazu hamutuk 131, Covalima 81, iha Baucau hamutuk kazu 55 no iha Vikeke kazu hamutuk 53.
Iha inisiu pandemia hahu husi loron 21 fulan-Marsu to’o loron 30 fulan-Maiu tinan 2021, deteta ona ema ne’ebé infetada husi Covid-19 hamutuk 6.615.
Daudaun ne’e iha kazu ativu iha teritoriu Timor-Leste hamutuk 2.648. Munisípiu sira ne’ebé ho kazu ativu liu mak hanesan, iha Dili kazu detetadu hamutuk 2. 079, Baucau iha kazu 179, no Covalima iha kazu 150, Bobonaru 126 no Vikeke 35.
Asistente Editor: Saturnina da Costa
