Ministra Saúde, Odete Maria Freitas Belo, hatete, lansamentu kampaña vasina Pfijer mak pasu ida atu redus inpaktu Covid-19 iha komunidade sira no mós ajuda nasaun hodi rekopera hikas fali ekonomia rai laran.
“Bainhira simu ona vasina, ohin loron ita hatudu ona ita nia kompromisiu hodi redus impaktu Covid-19 no proteze oan sira no mós imi nia familia sira, ha’u enkoraja sira hotu ne’ebé elijivel atu hodi simu vasina,”dehan nia iha EBC 30 Agostus Komoro, Dili, kuarta horseik (27/10).
Governante ne’e hatutan, ba labarik no adolosente sira ho tinan 12 to’o 17 iha Munisipiu Dili no Likisa, atu bele simu vasina hodi prevene an husi moras Covid-19.
Iha fatin hanesan, Ministru Edukasaun Juventude no Desportu (MEJD), Armindo Maia hatete, Governu ho inan-aman sira tenki servisu hamutuk oinsa labarik sira bele simu vasina.
Tuir Organizasaun Mundial Saúde (OMS) no UNICEF katak, vasina ne’e seguru ba labarik sira iha mundu.
Entretantu, estudantes Carjenia de Jesus Expostu hatete, antes atu simu vasina, sira hetan uluk autorizasaun husi inan-aman katak, oan sira bele simu vasina.
“Bainhira ha’u simu vasina ne'e senti isin todan uituan, maibé la to’o loron ida senti diak ona,”dehan nia.
Nune’e, nia rekomenda ba maluk estudante sira ne’ebé ho idade 12 to’o 17 atu labele tauk simu vasina, tanba vasina ne’e seguru hodi prevene moras Covid-19 labele hada’et liu tan.
Asistente Editor: Saturnina da Costa
