Ministru Justisa, Tiago Sarmentu Amaral hatete, guarda prizional sira ne'ebe servisu iha prizaun sira hanesan, Bekora, Suia no Gleno iha vontade hodi fó atendimentu prizioneiru sira, maibe persiza tau matan ba sira nia servisu di’ak liu tan.

"Iha ha'u nia mandatu iha Oitavu Governu sira nia estatutu ami prepara hotu ona, nune’e iha mandate Governu foun bele aprova, tanba estatutu ba guarda prizional sira tinan 20 ona seidauk iha mudansa no laiha atensaun," informa Ministru Tiago iha Palasiu Governu, (07/06).

Nia hatutan, Governu foun persija tau atensaun ba sevisu guarda prizional sira, tanba sira servisu tinan 20 ona.

Nia dehan, mandatu VIII Governu iha planu ona atu harii mos prizaun bo'ot, maibe labele realiza tanba mandatu remata ona, tan ne’e espera ho Governu foun bele realiza planu hirak ne'e.

"Ha'u espera ministru foun mai bele iha politiku diak para depois bele resolve prizaun sira, tanba prizaun mak akumula dadur sira," tenik nia.

Nia haktuir, bainhira Governu foun dezenvolve diak ona prizaun sira bainhira re-intrega ema ba iha sosiedade nia leet atu sai ema ne'ebe diak.

Iha sorin seluk, Koodenadora Organizaun Naun Governamental, La'o Hamutuk Marta da Silva husu ba Governu foun tenke dezenvolve diak liu tan Guarda prisional sira iha prizaun.

Nia dehan, tinan 21 ona independensia tanba ne'e bainhira mandatu Governu foun ida tenke tau atensaun dezenvolve diak setor justisa liu-liu hadia sistema no Apoiu fasilidade sira iha tribuna tantu prizaun sira hotu.

"Nune'e, tenke dezenvolve diak liu tan prizaun sira oinsa mak aloka osamentu ba prizaun sira nune'e sira ne'e halo servisu durante oras 24 tenke iha atendimentu diak ba dadur sira", dehan nia.

Nia dehan, esperansa ba governu foun tenke dezenvolve prizaun sira sai prizaun produtivu, oinsa mak bele produs buat di’ak ba dadur sira.

"Ha'u hatene governu foun iha planu oinsa dezenvolve prizaun sira sai prizaun produtivu oinsa mos bele dezenvolve dadur sira iha area solda sira no bele produz buat sira ne'ebe bele serbisu hetan osan nune'e bele fornese fali ai-han ba dadur sira," tenik nia.