Deputadu Juvinal Mericio Akara hatete, orsamentu retifikativu daudaun ne'e la iha tempu ona atu halo diskusaun no laiha ona tempu atu halo ezekusaun tanba hela de'it ona loron sanulu atu taka portál orsamentu tinan ne'e nian.

Nia hatutan, atu garante funsionamentu governu ne'e nian, liu-liu funsionamentu mákina Estadu ohin loron Estadu ne'e sei iha hela osan atu responde.

"Foin lalais mak Governu transfere tan osan tokon $123 husi Fundu Petrolíferu (FP). Tanba ne'e, Governu ne'e osan iha hela", dehan Mericio, iha Uma Fukun PN, horisehik.

Nia hatutan, osan ho montante boot ne'e sira sei jere iha semana ida ne'e nia laran. Tanba ne'e, garante katak osan sei iha hela.

Osan sira ne'e bele foti, tanba osan ne'e tinan 2017 nian, maibé tenke halo klarifikasaun.

Iha fatin hanesan, Prezidente Bankada CNRT, Arão Noe de Jesus hatete, osan ne'ebé governu foti husi Fundu Petrolíferu ne'e presiza lei ruma, maibé foti ona tanba ne'e tenke halo klarifikasaun.

Hataan ba kestaun ne'e, Ministru Planeamentu Finansas, Rui Gomes hatete, proposta ne'ebé hatama ba rekiza tokon $123 husi fundu petrolíferu mai iha banku sentrál ne'e tanba kestaun jestaun.

Transferénsia Fundu Petrolíferu ne'e mai iha banku sentrál ne'e hanesan transferénsia ikus husi anu orsamentál 2017 nian ho objetivu atu halo likidasaun ba despeza Estadu nian. Husi transferénsia ne'e sei tama mós ba orsamentu duadesimu.

Ministru Finansas ne'e konsidera transferénsia ne'e aktu ida normál, tanba kuandu tanba kada tinan Estadu ne'e sempre halo ida ne'e. Nune'e bele prevene frutura iha likidés nian.