Komisaun Interministerial ba Koordenasaun Cadeia de Valor kria iha 6 Maiu 2022 liu husi rezolusaun governu ne’ebé aprova husi Konsellu Ministru ho objetivu atu fasilita koordenasaun ne’ebé di’ak liu tan entre ministériu setorál sira hodi tau rekursus no servisu hamutuk asegura soberania ai-haan no nutrisaun ne’ebé sei reforsa liu tan Timor-Leste ninia independénsia ekonómika.
Iha Kinta (20/10), liu husi enkontru Komisaun Interministerial Cadeia de Valor ne’ebé lidera husi Primeiru Ministru Taur Matan Ruak nu’udar Prezidente Komisaun, delibera no aprova atu halo emprestimu ba Banku Dezenvolvimentu Aziatiku (ADB) ho montante millaun $70.
"Aprova atu simu emprestimu husi ADB atu finansia liu-liu iha setór produtivu nian, setór agrikola, sei empresta $70 miloens ho grand $5 miloens,” informa Ministru Koordenadór Asuntu Ekonomiku (MKAE) no Koordenadór Komisaun Interministerial Cadeia de Valor, Joaquim Amaral, hafoin reuniaun, iha palasiu governu, horseik.
Ministru ne’e dehan, negosiasaun emprestimu ne’e hala’o ona dezde tinan rua kotuk ba no ho aprovasaun ne’e emprestimu husi ADB ne’e sei realiza iha tinan oin.
“Asinatura ita sei hala'o iha Fevereiru tinan oin, maibé emprestimu ne'e ho ninia grand ne'e fasilita ona asistensia tekniku. Bele hahú daudauk serbisu balun to'o realiza emprestimu ne'e, to'o ita finansia projetu ne'e," dehan nia.
Emprestimu ne’ebé halo, nia dehan, sei kobre barak liu ba nutrisaun, seguransa alimentar no mitigasaun ba mudansa klimatika, liu-liu rai halai.
Nia esplika, emprestimu ne’e sei finansia projetu balun ne’ebé bele fó biban ba dezenvolvimentu seitor agrikultura.
"Ita prezerva bee iha rai naruk sira hafoin halo tanki akaptasaun ba bee nune'e bele fornese bee ba iha agrikultór sira ne'ebé bele uza hodi kuda modo, bele mós hodi halo sira-nia kriasaun sira seluk," nia dehan.
Ekipa tekniku sira, nia dehan, halo ona dezeñu ba projetu integradu ida ne’ebé sei kobre munisipiu Dili, Manatuto, Ainaro, Manufahi no Rejiaun Administrativu Espesial Oekusse-Ambeno.
"Ne'e ita primeiravez foti emprestimu investe iha setór agrikultura, ida ne'e hein katak emprestimu hodi halo investimentu agrikultura nian bele sai hanesan modelu ida par ita hasa’e produsaun iha agrikultura no mós ita bele rezolve ita-nia seguransa aihaan," nia dehan.
Ministru Joaquim hatutan, ekipa tekniku sira hahú ona pre-estudu viabilidade iha fulan Setembru no projetu ne’e sei hahú iha Fevereiru 2023 to’o Dezembru 2029.
Molok ne’e, Vise Ministru Finansas, Antonio Freitas informa, iha semana kotuk nia parte konklui ona negosiasaun kona-ba emprestimu osan millaun $73.3.
"Ha’u informa ba Primeiru Ministru katak ita konklui ona negosiasaun empresta ka deve tokon $73.3 ho Department of Foreign Affairs and Trade husi Australia iha semana kotuk. Tanba ne'e husu orientasaun husi Primeiru Ministru hodi haree fali pasu sira tuir mai," informa Antonio hafoin enkontru ho Primeiru Ministru Taur Matan Ruak iha rezidensia ofisial Xefe Governu iha Farol, Segunda (17/10).
Emprestimu ho tokon $73,3 ho objetivu atu finansia dezenvolvimentu projetu espansaun Aeroportu Internasional Prezidente Nicolau Lobato.
"Entaun hafoin konklui dokumentu nee sei aprezenta ba ita-nia legal sira hodi halo apresiasaun antes submete ba Konsellu Ministru atu halo aprovasaun no ita espera mais tarde iha Fevereiru 2023 ita bele asina ona akordu emprestimu ho governu Australia," dehan nia.
