Traballadór na’in 59 ne'e kompostu husi mane 57 no feto na'in rua (2) no husi traballador ne'e mos maioria re-entry, tan ne'e iha re-entry 44 no ida ne'ebé foun iha 15.

Sekretariu Estadu Formasaun Profisional no Empregu Rojériu Aroújo Mendonça hatete, traballadór sira ne'ebé hetan oportunidade hodi ba servisu iha rai liur, nia objetivu atu hasa'e kresimentu ekonomia fámilia no rai laran nian.

"Ba traballadór sira no familia sira ita boot sira hetan oportunidade hodi ba servisu iha Australia objetivu atu hasa'e kresimentu ekonomia familia nia no ekonomia rai laran," dehan Sekretáriu Estadu iha Salaun SEFOPE Kaikoli, Kinta (16/11).

Nune'e Governante, hato’o mensajen ba traballadór sira hodi mantein disiplina iha servisu katak labele halai sees husi sistema. No ida seluk maka labele komete krime ka prátika arte-marsiais iha ema nia rain tanba to’o ohin loron seidauk akontese krime tan prátika arte-marsiais tantu iha Austrália no mós iha Koreia do Súl.

"Ba traballadór sira ne'ebé hetan oportunidade hodi ba servisu labele sai husi sistema no tenki hamenus konsumu alkohol, Tanba Joven barak la fila mai tanba sai husi ona sistema," dehan Governante ne'e.

Sekretáriu Estadu husu mos ba traballadór sira hodi hakbesik aan nafatin ba igreja halo orasaun no mos kultura liuhosi bei-ala sira hodi bele alkansa susesu iha servisu sira.

Enkuantu, traballadór ne’ebé maka oras-ne’e servisu ona iha Kompañia oioin iha Austrália, no servisu iha área oioin maka hanesan Hortikultura, Ospitalidade, Kuidadu ba ferik-katuas (Aged Care), Asistente familia (Cleaner), Agrikultura, Peskas, Prosesamentu Ai-han (Food Hygiene) no Prosesamentu na’an (Meat work).

Enkuantu, tuir dadus total traballadór ne’ebé ba servisu ona iha Australia husi tinan 2012 to’o 2023 hamutuk ema na’in 12.516, kompostu husi feto na’in 3.689 no mane na’in 8.827.