Hafoin analiza aprezentasaun husi koordenadór Sentru Integradu ba Jestaun Krize (SIJK) kona-ba pontu situasaun epidemiolójika iha Timor-Leste.

“Konsellu Ministru deside hodi rejista  alterasaun ida ne’ebé permite ba realizasaun selebrasaun koletiva relijioza no eventu koletivu kultura sira seluk, nune’e husu ba ema sira ne’ebé tuir serimonia nafatin mantein distánsia, pelumenus, metru ida, ho ema seluk ne’ebé la hela hamutuk, no nafatin uza mascara oin ne’ebé taka to’o inus no ibun,” dehan  Ministru Prezidensia Konsellu Ministru, Fidelis Leite Magalhães, iha salaun Ministériu Finansas, Aitarak-Laran Dili, kuarta ohin (26/05).

Tuir informasaun ne’ebé Governu simu husi Arsebispo Dili katak bainhira realiza fali misa atividade relijioza, sei aumenta mós misa atu nune’e bele hamenus numeru sarani sira.

Entretantu, Munisípiu Dili mantein impozisaun konfinamentu domisiliáriu jerál ba ema hotu ne’ebé oras ne’e daudaun iha hela Munisípiu Dili.

Exetu ho razaun sira ne’ebé antes ne’e define ona, liuliu ho razaun sira hanesan, seguransa públika, serbisu ba asesu beins no servisu sira nesesidade dahuluk nian.

Asistente Editor: Saturnina da Costa