Hafoin sorumutuk Konsellu Ministru (KM), Ministru Prezidensia Konsellu Ministru Fidelis Leite Magalhãens informa katak, hafoin análiza aprezentasaun husi Sala Situasaun, iha Sentru Intergradu Jestaun Krize, kona-ba pontu situasaun husi SARS-CoV-2 iha país, Governu deside ona atu hala’o serka sanitária ka konfinamentu obrigatóriu iha Munisípiu Dili, durante loron hitu, , hahú oras 00:00 loron 9 fulan-marsu to’o oras 23:59 loron 15 fulan-marsu, ho posibilidade atu extende tan liu loron hitu.

Nune’e, bandu hala’o deslokasaun husi rai, tasi ka area ba Munisípiu seluk, exeptu iha kazu ne’ebé fundamentu ho razaun seguransa, saúde públika, umanitária ka seluk ne’ebé revela nesesária atu hala’o ba interese públiku, ne’ebé autoriza husi Ministériu Interiór.

Tuir Fidelis esplika katak, konfinamentu obrigatoriu ba populasaun sira ne’eb’e hela iha munisipiu Dili bainhira atu desloka sai husi uma tenki ho razaun nesesidade fundamentu.

Signifika katak,bele sai uma bainhira ba sosa sasan ka pagamentu servisu ba nesesidade dahuluk, liuliu  sosa ai-han, pagamentu fornesimentu enerjia elétrika ka pagamentu servisu telekomunikasaun no asesu ba internet.

"Bandu sai husi uma bainhira la nesesariu iha fatin publiku ne’ebé bele fo risku ba Covid-19." dehan nia iha Ministeriu Finansas,(8/3)

Membru Governu no órgaun ezekutivu husi ema koletiva públika iha administrasaun indireta Estadu identifika funsionáriu, ajente no traballadór sira husi administrasaun públika ne’ebé la hala’o servisu esensiál tur hakmatek iha uma.

Regras ne’ebé presiza atu halo tuir nafatin mak hanesan, fase lima bebeik, uza maskara, labele halibur malu, distansiamentu sosial kuaze metro 1.5 no labele sai bainhira la nesesariu.

Tuir dadus  kazu foun hamutuk na'in tolu, na'in rua husi Dili ne'ebe relata Domingu kalan no na'in ida husi Covalima relata Sabdu lokraik. Nune'e pasiente moras Covid-19 hamutuk 28, ne’ebé sei iha sala izolamentu Vera Crus Dili.