DILI: Governu liu husi Konsellu Ministru (KM), aprova ona planu vasinasaun kontra Covid-19.
Tuir Ministru Prezidensia Konsellu Ministru, Fidelis Leite Magalhãens informa, Konsellu Ministru aprova ona planu vasinasaun kontra Covid-19, ne’ebé aprezenta husi Vise-Primeiru-Ministra no Ministra Solidariedade Sosiál no Inkluzaun, Armanda Berta dos Santos no husi Komisaun Interministeriál ba Elaborasaun Koordenasaun Ezekusaun Planu Vasinasaun kontra Covid-19.
“Tuir roteiru ne’ebé aprezenta hein katak doze dahuluk 33.600 to’o Timor-Leste iha semana dahaat fulan-marsu tinan 2021 nian no lansamentu ba faze dahuluk vasinasaun sei hahú iha segunda semana fulan-abril,”dehan nia iha Ministeriu Finansas, Aitarak laran (8/3).
Nune’e atu prevene Covid-19, ba ema sira hotu ne’ebé ho idade 18 ba leten sei hetan vasina to’o final (fulan dezembru) tinan 2021.
Entretantu, vasinasaun ba menór husi tinan 18 sei hala’o iha tinan 2022, maibé ninia planifikasaun sei dependente ba rekomensadaun téknika husi Organizasaun Mundiál Saúde (OMS).
Nune’e hala’o hela atividade planeamentu no preparasaun implementasaun planu vasinasaun, hanesan preparasaun kondisaun armazenamentu no formasaun ba ekipa sira.
