Enkuantu, projetu dahuluk mak kona ba, abertura ba prosedimentu aprovizionamentu, ho tipu ajusta diretu, ba adjudikasaun kontratu públiku ba konstrusaun Sentru Akollimentu Multifunsaun Dili.

Nune’e, projetu daruak mak prosedimentu aprovizionamentu, liu husi konkursu públiku internasionál, ba adjudikasaun konstrusaun ba edifísiu foun Administrasaun Munisipál Manatutu nian.

Ministru Prezidensia Konsellu Ministru, Fidelis Leite Magalhães, hatete, sentru akollimentu multifunsaun Dili ne’e, ho objetivu atu hela provizoriamente husi vítima sira hetan asidente grave no katástrofe, nune’e mós ema ka agregadu familiár sira ne’ebé afeta ona.

“Projetu ka medida re-ordenamentu territóriu ka re-konversaun urbanístika ka projetu konstrusaun, reabilitasaun infraestrutura públika ne’e, sein prejuizu mós atu integra fatin sira ne’ebé destina ba uzu komersiál no husi uzu natureza koletiva sira seluk,”dehan nia iha Palasiu Governu, kuarta ne’e (05/10).

Governante ne’e dehan, projetu ne’e, inklui área rezidensiál ida ho apartamentu besik 162, zona komersiál no kultura, refeitóriu ida ba ema besik 300, auditóriu ida no sentru atendimentu médiku ida.

Entretantu, kona ba edifísiu foun Administrasaun Munisipál Manatutu nian, sei iha andar tolu, iha besik gabinete 20 no sei permite besik ema na’in 200 bele servisu simultáneu.

Enkuantu, Governu garante katak konstrusaun ne’e sei finaliza iha tinan 2025.