Nia dehan, agora dadaun Timor oan seidauk servisu iha Brunei Darussalam, se bainhira Governu Timor Leste iha ona akordu mak foin haruka Timoroan ba servisu iha ne'eba.
Nia hatete, se ba servisu kompañia sei anunsiu, ha'u sei ba halo brifing ho Sekretáriu Estadu Kooperativa (SEKoop) iha loron tuir mai, atu ko'alia kona-ba prosesu sira ne'e hotu, ne'ebé hein bainhira lo'os ona aviaun Brunei sei mai foti ema.
"Brunei sei halo rekrutamentu ba traballadórr Timoroan ema rihun rua nulu resin, ne'e signifika sei presija maibé antes ba sei iha mós treinamentu uluk, tenke iha ona skill ruma mak ba, labele ba hanesan ne'e de'it labele, tanba kompañia lasimu," dehan Embaixador Tl ba Brunei Darussalam, Abel Guterres ba jornalista sira hafoin remata enkontru ho Xefe Estadu iha Palasiu Prezidensia Bairu-Pite, Tersa (10/10).
Nia afirma, Timoroan ne'ebé atu ba servisu iha Brunei iha área hospitalidade, hotél, restaurante, loja, no balun mós bele servisu iha agrikultura, konstrusaun, área sira ne'ebé kompañia sira presija.
Maibé, bainhira aranka halo servisu sei iha asina akordu entre Governu Timor Leste no mós Governu Brunei.
Nia esplika, liga ba iha saláriu iha diferente tanba Timor Leste iha saláriu mínimu maibé Brunei selu tuir akordu.
“Saláriu Brunei laiha saláriu mínimu, sira selu tuir akordu ne'ebé iha, no kompañia selu tuir ema nia skill, saláriu mínimu laiha, maibé ita iha ne'e iha, mais saláriu di'ak se saláriu la di'ak labele ba servisu," hatete nia.
Tanba ne'e ohin nia hamutuk ho kompañia husi Brunei mai hasoru malu Prezidente Repúblika Jose Ramos Horta ko'alia traballadór Timoroan ne'ebé atu ba servisu iha Brunei ne'ebé bainhira Xefe Estadu nia vizita iha fulan tuir mai sei asina akordu entre Timor Leste ho Brunei karik akordu ne'e asina ona traballadór sira servisu iha Brunei.
Entretantu, iha enkontru ne'e Prezidente Repúblika José Ramos Horta sente kontente hasoru malu ho kompañia husi Brunei Darussalam no mós Embaixadór Timor Leste ba Brunei hodi bele ko'alia kona-ba kooperasaun servisu. Xefe Estadu mós espera katak Governu bele iha akordu nune'e bele haruka Timoroan sira bele ba servisu iha Brunei tuir akordu ne'ebé rai rua asina hamutuk.
Molok ne'e, iha loron 21 Setembru 2022, Diretór Jerál Sekretaria Estadu Formasaun Profisionál no Empregu (SEFOPE), Paulo Alves hatete, sira nia parte hetan ona kontaktu husi Timorense Manpower Agency (TMA) hodi halo rekrutamentu ba traballadór Timor oan hodi ba servisu iha Brunei Darusalam iha área tolu hanesan hospitalidade, agrikultura no konstrusaun.
