Embaxadór Australia ba Timor-Leste, Peter Robert hatete, elikoptru ne’e nudar ajuda kontinuasaun ida husi Governu Australia durante ne’e fó ona asistensia umanitaria ba vitima inundasaun ne’ebé akontese iha loron 4 fulan-Abril no ajuda kombate Covid-19.
Nia dehan, molok ne’e mós Governu Australia fó ona orsamentu ba Timor-Leste hamutuk dolar australia millaun $7 ba asisténsia umanitaria.

Nia klarifika katak, husi total orsamentu ne’e inklui ona finansiamentu ba operasionál elikoptru ho nu. N365JA, ne'ebe estadia iha Aeroportu Komoro.
"Apoiu elikoptru ne’e kontinuasaun husi ajudus asistensia umanitaria ba inundasaun 4 liu ba nomos ba Covid -19 hotu, total Osamento ne’ebé Governu Australia Oferese mai Timor-Leste hamutuk millaun 7 dollar Australia inkluindu ba finansiamentu elikoptru ne’e,"dehan Robert iha Aeroportu Internasionál Nikolau Lobato Dili, hafoin ofisialmente entrega elikoptru ne’e ba Governu liuhusi Sekretariu Estadu Protesaun Sivil, Ministra Negosiu Estranjeiru Koperasaun (MNEC), no Vise Ministru Interior, kuarta ohin (21/4).
Nia esplika katak, seremonia entrega elikoptru ida ne’e realiza tanba Governu Timor-Leste liuhusi kompañia internasionál SANTOS mak halo negosia ho ba kompañia aviasaun elikoptru MCDERMOTT, iha Australia.
Tanba ne’e, SANTOS halo kontratu ho kompañia aviasaun elikoptru nian iha Australia hodi bele suporta atividade Governu no nesesidade iha Munisipiu sira.
Entertantu Director Kompañia SANTOS, José Lobato justifika katak prezensa elikoptru ne’e realiza tanba bazea ba pedidu husi Governu Timor-Leste.
"Elikoptru ne’e Governu Timor-Leste kontrata durante fulan ida hodi hafasil atividade Governu ba Munisipiu sira hodi atende vitima inundasaun ho Covid -19 ho lalais,”dehan Lobato.
Nia esplika katak, Governu Timor-Leste liuhosi kompania SANTOS mak halo negosiasaun ba kompania elikoptru ne’e.
Entretantu kustu ba aluga no operasionál elikoptru, SANTOS finansia ho orsamento hamutuk dolar australia rihun $250 ba fulan ida tomak no bele extende kontratu bazea ba Governu Timor-Leste nia pedidu.
Elikoptru ida ne’e seguru tanba bele semo no tuun iha kualker Aeroportu iha Munisipiu sira. Elikoptru bele tula ema na’in 10.
"Santos buka elikoptru ne’ebé natoon hodi bele tuun iha kualker aeroportu, ita bele buka kontratu aviaun boot maibé Munisipio balu susar bainhira aviaun boot tuun, tanba ne’e SANTOS hili elikoptru ida ne’e hodi kontratu durante fulan ida bazea ba pedidu governu Timor-Leste”.

Jornalista:Camilio de Sousa

Editor:Jose Sarito Amaral