Diretor Fundasaun Hadomi Timor, Abrão Monteiru hatete, apoiu ba estudante sira ne’e ho objetivu atu hakman sira nia todan ne’ebé durante iha situasaun serka sanitaria no inundasaun sira labele lao ba mai no balun afeitadu husi inundasaun tanba hahan no roupa no mós sasan uma laran la konsege salva.
“Tuir dadus ne’ebé ami rekolla iha 28 estudantes ne’ebé ohin ami la konsenge fahe hotu tanba balun laiha transporte no iha atividade seluk hodi la mai partisita foti sira nia apoiu ne’e. no ami konsege fahe deit ba estudante na’in 20 no restu ami rai hela no ami sei kontaktu sira ne’ebé seidauk hetan bele mai foti ou ami bele lori ba sira nia fatin,”dehan nia iha salaun Luta Hamutuk, Farol Dili,(21/04).
Nia hatutan, ba futuru ONG FTH kontinua buka dalan hodi halo komunikasaun ho komunidade sira hodi bele fasilita maluk sira ne’ebé presiza tebes hodi fó apoiu.
Apoiu ne’ebe fó ba estudante sira mak hanesan, fós, mina, supermie, kaneka no bikan.
Entretantu, iha semana kotuk sira mós apoiu ona umanitaria ba komunidade balun iha Metiaut hamutuk familia 26, ne’ebé afeita ba serka sanitaria no inundasaun.
Iha fatin hanesan, estudante ida ne’ebé hela iha kost ho naran Abilio da Costa espresa nia sentiment kontenti ho apoiu ne’ebé uituan maibé ida ne’e bele hakman ona sira.
“Agradese tebes ba NGO Hadomi Timor ne’ebé halo ona nia kontribuisaun hodi apoiu ona mai iha tempo defisil ida ne’e hodi sustenta nesesidade uma laran”.dehan nia.
Nia mós hatutan, molok ne’e iha ona maluk balun ne’ebé apoiu ona sira maibé seidauk sufisiente.

Jornalista:Saturnina da Costa

Editor:Jose Sarito Amaral