Tuir Ministru Prezidensia Konsellu Ministru, Fidelis Leite Magalhães, hatete, objetivu husi proposta ne’e, atu garante valor mínimu pensaun invalidés no idozus sira, iha ámbitu rejime kontributivu seguransa sosiál nian , bazeia ba karreira kontributiva traballadór sira nian.
“Nune’e atu garante pensaun sira ne'e, husi rejime kontributivu, nunka sei iha valór ida, ne'ebé ki'ik duké pensaun sosial sira, hodi nune'e bele valoriza esforsu kontributivu traballadór sira nian,”dehan nia iha Palasiu Governu, kuarta (25/05).
Governante ne’e hatutan, projetu dekretu lei daruak nian mak aprova pensaun sosial.
Prestasaun sosial foun, ne'ebé kria husi diploma ida ne'e ho karater pensaun sosial ida no la'os subsídiu, ho objetivu mak atu asegura rendimentu ida mínimu ne’ebé dignu ba ema hotu ne’ebé presiza liu, tanba laiha rendimentu seluk no iha situasaun ferik-katuas no invalidés.
“Pensaun sosiál ida-ne’e sei substitui subsídiu apoiu ba ferik-katuas no Inválidu sira (SAII), hodi halo sistema seguransa sosiál sai justu liu tán,”tenik nia.
Nia esplika, ho alterasaun lejislativa ida ne’e pretende alterasaun sira tuir mai, • Muda konseitu, husi subsídiu ba pensaun sosiál,
• Altera ámbitu pesoál hodi inklui traballadór sira ne’ebé inklui iha sistema kontributivu, maske laiha direitu ba pensaun,
• Ajusta valór prestasaun nian, hodi garante katak valór pensaun nian la ki’ik liu duké limite liña pobreza internasionál nian,
• La permite akumulasaun ho rendimentu seluk ba benefisiáriu foun;
• Altera periodu ba pagamentu sira, husi pagamentu semestrál ba pagamentu mensal,
Entretantu, projetu dekretu lei datoluk makdekretu-Lei ne’ebé kria sistema verifikasaun ba inkapasidade sira.
Objetivu husi projetu ne’e mak atu kria sistema ida hodi halo verifikasaun ba situasaun inkapasidade ba efeitu atribuisaun prestasaun sosiál nian.
Ho diploma ida ne’e, define prosedimentu administrativu ba verifikasaun téknika iha situasaun inkapasidade.
Enkuantu, servisu verifikasaun inkapasidade hanesan instrumentu tékniku espesializadu ida, kompostu husi meius téknikus no materiais, ne’ebé sei funsiona iha servisu integradu iha Institutu Nasionál no Seguransa Sosiál (INSS), servisu perísia médika no servisu apoiu administrativu.
