Tuir dadus husi HNGV, hahú husi fulan Janeiru to’o Abril 2022, inan isin-rua ne’ebé baixa iha maternidáde hamutuk na’in 1.677. Husi númeru ne’e, bebé na’in 32 mate iha inan nia kabun laran no na’in 32 mate hafoin inan partus.

"Bebé na'in 32 mate iha inan nia kabun antes partu no na'in 35 mate hafoin partu," informa Xefe Kontrolu Kualidade Komunikasaun Sosial HNGV, Sara Maria F. Xavier iha nia knar-fatin, Tersa (24/05).

Nia dehan, bebé hirak ne’ebé mate iha inan nia kabun laran maioria tanba kauza husi infeksaun husi inan ne’ebé la kontrola durante isin-rua.

Bainhira inan ida isin-rua, nia hatutan, tenke aprezenta aan kada fulan atu pessoal saúde bele deteta sedu kondisaun husi inan ne'e hodi bele prevene antes.

“Importante tebes ba inan hotu bainhira isin-rua tenke halo kontrolu maximu iha sentru saúde ne'ebé besik atu pessoal saúde bele deteta sedu komplikasaun ne'ebé mosu, nune'e labele fo impaktu ba bebé mate iha inan nia kabun laran.”

Nia hatete, inan mós presiza konsumu nutrisaun ne'ebé adekuadu hodi bele fó nutriente ne'ebé di'ak durante bebé iha inan nia kabun laran.

Ba inan na’in haat ne’ebé mate, nia dehan, kauza husi komplikasaun hemorazia todan no hipertensaun.

Entretantu, tuir dadus, iha tinan 2020 kazu bebé mate iha HNGV na’in 94. Enkuantu, iha tinan 2021 HNGV la update númeru kazu mate tanba pandemia Covid-19.