DILI: Governu liu husi sorumutu Konsellu Ministrus extra-ordináriu, iha auditóriu Kay Rala Xanana Gusmão, iha Ministériu Finansas aprova ona projetu Rezolusaun Governu ni’an, ne’ebé aprezenta hosi Primeiru-Ministru, Kay Rala Xanana Gusmão, ne’ebé politika no planu asaun ba promosaun akonómia tasia ida ne’ebé reziliente no sustentável iha Timor-Leste.

“Ho aprovasaun ba Rezolusaun ida-ne’e, Governu estabelese vizaun polítika no estratéjia asaun Governu Konstitusionál IX ba setór ida-ne’e ba tinan sanulu oin mai, ho koordenasaun direta husi Primeiru-Ministru, ho apoiu husi Gabinete Fronteiras Terrestres no Marítimas, no mós Unidade Ekonomia Azul, hodi garante koordenasaun entre ministérius no parseiru relevante sira,” Sita komunikadu ne’ebé Média INDEPENDENTE asesu husi Média G-PM, Sexta (20/02).

Haktuir komunikadu katak Polítika ne’e organiza bazeia ba eixu sira ne’ebé promove investigasaun no literasia kona-ba tasi, protesaun ba biodiversidade tasi nian, utilizasaun sustentável ba rekursus, inklui peskas, akuikultura, turizmu no enerjia renovável sira, nune’e mós reforsu ba transporte marítimu no dezenvolvimentu portuáriu.

“Prevee mós fortalesimentu hosi governasaun tasi nian, integrasaun hosi medidas hodi adapta ba mudansa klimátika no kriasaun mekanizmus finansiamentu, monitorizasaun no avaliasaun nian,” Kata komunikadu.

Nune’e, ho desizaun ne’e, Ezekutivu konsolida ninia kompromisu ba tasi nu’udar pilár ida hosi dezenvolvimentu nasionál, ho objetivu atu promove kriasaun empregu, hadi’a kondisaun moris hosi populasaun tasi-ibun sira no proteje ekosistema sira, iha kuadru kreximentu ida ne’ebé sustentável no inkluzivu.