Projetu ne'e aprezenta husi Ministru Ensinu Superiór, Siénsia no Kultura, José Honório da Costa Pereira Jerónimo no mós Reitór UNTL, João Soares Martins.
Tuir komunikadu ne’ebé Online INDEPENDENTE asesu katak, Diploma ne’e ho hanoin atu reformula Estatutu UNTL nian, hodi ajusta ninia estrutura organizasionál no jestaun hodi korresponde di’ak liu ba ejizénsias atuál ensinu superiór nian.
"Ninia objetivu atu garante organizasaun ida-ne’ebé efisiente no adaptada liu ba nesesidades foun instituisaun nian, reforsa ninia misaun atu kria, habelar no aplika kuiñesimentu ba dezenvolvimentu nasionál,”dehan Komunikandu ne'ebé Online ne’e sita, iha Pájina Governu Timor-Leste, Kuarta (07/05).
Entretantu, estatutu foun ne’e introdús alterasaun signifikativa iha estrutura interna UNTL nian, inklui kriasaun órgaun foun sira no define fila-fali kompeténsia órgaun balun ne’ebé eziste ona.
Alterasaun sira ne’e ho objetivu atu optimiza jestaun universidade, promove inter-dixiplinaridade ne’ebé boot liu iha ensinu no investigasaun no mós garante utilizasaun rekursu ne’ebé di’ak liu.
Nune’e, bainhira diploma ida ne’e tama iha vigór, sei revola dekretu-Lei n. 16/2010, loron 20 fulan-Outubru, ne’ebé estabelese Estatutu anteriór UNTL nian.
