Estadu emerjénsia, daudaun ne’e renova ona, abranje territóriu nasionál tomak no vigora entre oras 00.00 husi loron 3 fulan-abríl to’o oras 23.59 loron 2 fulan-maiu tinan 2021.
“Medida sira ne’ebé impoin iha diploma ne’e mak hanesan ho Dekretu Governu anteriór ne’ebé define ona regra ezekusaun sira Deklarasaun Estadu Emerjénsia nian,”dehan nia iha konferensia imprensa, Palasiu Governu (01/04).
Fidelis esplika, medidas ne’e destaka de’it katak ba oin ema hotu ne’ebé suspeita iha infesaun SARS-CoV-2 ka hetan kontaktu ho individu infetadu ho SARS-CoV-2 iha obrigasaun atu sujeita ba realizasaun teste.
Nune’e, mantein jeneralidade medida anteriormante sira ne’ebé aprova ona, liuliu proibisaun pasajen fronteira terrestre ba objetivu tradisionál ka kustumeiru no ba asesu merkadu reguladu sira.
Individu hotu-hotu ne’ebé hakarak tama ka sai husi territóriu kontinua sujitu ba kontrolu sanitáriu, hodi impede sirkulasaun internasionál ba ema hotu ne’ebé hatudu sintomas infesaun husi SARS-CoV-2 ka COVID-19.
Governante ne’e husu, ema hotu mantein impozisaun izolamentu profilátiku (kuarantena) obrigatóriu ba sidadaun hotu-hotu ne’ebé tama iha territóriu nasionál husi estranjeiru, ne’ebé hatudu sintomas Covid19, no suspeitu infetadu ona ho SARS-CoV-2, maibé ninia rezultadu teste Covid-19 la konkluzivu, no refere ba profisionál saúde sira ne’ebé servisu iha sentru izolamentu, sira ne’ebé tau-matan ba infetadu SARS-Cov-2 nian ka ne’ebé iha kontaktu besik, hela hamutuk ka partilla ambiente ne’ebé hanesan ho ema ne’ebé sofre moras Covid-19 nian.
Despeza sira kona-ba izolamentu profilátiku sei suporta husi individu ida-idak bainhira kumpri ona iha estabelesimentu saúde, rezidénsia ka iha sentru izolamentu privadu sira.
Individu hotu-hotu ne’ebé diagnosa ona Covid-19 tenke sujeitu ba izolamentu terapéutiku, ne’ebé sei bele kumpri iha nia hela fatin, tuir despaxu Ministra Saúde nian.
Durante vijénsia diploma ida-ne’e nian, ema hotu ne’ebé hela iha Timor-Leste, kontinua iha obrigasaun atu mantein distánsia, pelumenus, metru ida husi ema seluk ne’ebé ho nia la hela hamutuk iha uma ida.
Iha obrigasaun mós atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza; no fase liman bainhira hakarak tama ba estabelesimentu komersiál sira, industriál ka prestasaun servisu nian ka ba edifísiu sira iha ne’ebé servisu administrasaun públika nian funsiona. Iha obrigasaun mós atu evita formasaun halibur-malu, iha dalan públiku.
Inklui bainhira atu sai ba Munisipiu ou mai Dili tenki hatoo pedidu ba Sala Situasaun Sentru Integradu Jestaun Krize (SIJK) iha ida-idaik nia Munisipiu ne’ebé estabelesidu ona, atu nunee halo teste swab iha Laboratoriu Nasional Saúde.
Entretantu, Governu aprova medidas ne’e hafoin Prezidente Repúblika, Francisco Guterres Lú Olo, iha 31 marsu 2021, dekreta estadu emerjénsia dasanuluk-resin-rua ba loron loron tolu-nulu (30), hahú husi tuku 00.00 iha 3 abril 2021 no termina iha tuku 23.59 iha 2 maiu 2021, iha territóriu nasionál tomak.
Xefe Estadu dekreta Estadu Emerjénsia hafoin pedidu estensaun aprova iha Parlamentu Nasionál, kuarta horsehik (31/3), ho votus-a favor 49, kontra 0 no abstensoins 14.
Jornalista: Saturnina da Costa
Editor: Jose Sarito Amaral
