Tuir Ministru Prezidensia Konsellu Ministru, Fidelis Leite Magalhães hatete, Konsellu Ministru hala’o sorumutuk iha Palásiu Governu, iha Dili no, asiste ona aprezentasaun ida husi pontu situasaun epidemiolójika país nian, husi Sala Situasaun Sentru Integradu Jestaun Krize. Hahú kedas inísiu pandemia deteta ona ema hamutuk 2124 ne’ebé infetada ho Coronavírus foun. Iha kazu Deteta sira iha munisípiu sira hotu iha país, maibé Dili maka Munisípiu ida ne’ebé infetadu liu, iha ne’ebé 1794 infetadu mak rejista ona, no konsidera eziste klasifikasaun transmisaun komunitária. Oras ne’e daudaun iha kazu ativu hamutuk 1.104 no rejista ona kazu moderadu 21 no na’in rua grave ho COVID-19. Taxa insidénsia iha Munisípiu Dili oras ne’e daudaun maka 27,3 husi abitante rihun 100.
“Konsellu Ministru aprova ona projetu Dekretu Governu nian, ne’ebé aprezenta husi Primeiru Ministru, Taur Matan Ruak, kona-ba medida ezekusaun ba Deklarasaun Estadu Emerjénsia, ne’ebé efetua husi Dekretu Prezidente Repúblika nu. 24/2021, loron 28 fulan-abril, hodi hatán ba pandemia Covid-19.
Estadu emerjénsia ne’ebé renova daudaun ne’e abranje teritóriu nasionál tomak no vigora entre tuku 00:00 loron 3 fulan-maiu no tuku 23:59 loron 1 fulan-juñu tinan 2021.
Medida sira ne’ebé impoin iha diploma ne’e mak hanesan ho regra ezekusaun sira anteriór Deklarasaun Estadu Emerjénsia nian. Destaka de’it iha oras ne’ebé estabelese katak ema sira hotu ne’ebé ho sertifikasaun vasinasaun kompleta kontra Covid-19 la presiza hala’o izolamentu profilátiku obrigatóriu bainhira tama iha teritóriu nasionál mai husi rai-li’ur.
Regra sira-seluk mantein nafatin liuliu obriga sidadaun sira hotu ne’ebé hela iha Timor-Leste atu mantein distánsia pelumenus metru ida ho ema seluk ne’ebé la hela iha ekonomia komun. Kontinua obriga atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza, no fase liman bainhira hakarak tama ba estabelesimentu komersiál sira, industriál ka prestasaun servisu nian ka ba edifísiu sira iha ne’ebé servisu administrasaun públika nian funsiona. Iha obrigasaun mós atu evita formasaun halibur-malu, iha dalan públiku.
Jornalista:Saturnina da Costa
Editor:Jose Sarito Amaral
