Enkuantu, kontribuisaun finanseira ne’e Governu oferese ba Igreja katólica liu husi CET ba tinan orsamentál 2023 iha territóriu Timor laran tomak, ho objetivu atu finansia, atividades ho karaktér Edukativu mínimu 40%, atividade ho karaktér Sosiál mínimu 30%, atividades governasaun eklesiál labele liu 20% no atividades relasiona ho Jestaun subvensaun labele liu 10%.

Ministru Finansas hanoin hikas katak, akordu ne’e regulamenta akordu ne’ebé Estadu Timor-Leste no Estadu Santa Sé asina ona iha 14 Agosto 2015, hodi estabelese kuadru jurídiku ba relasaun entre Estadu rua, ne’ebé preve ona iha artigu 11˚, fó konsesaun ba Igreja katólica liuhusi kontribuisaun finanseira anuál.

Tuir Akordu Kuadru Foun entre Estadu Timor-Leste no Estadu Santa Sé ba periódu 2022 to’o 2027 ne’ebé Primeiru-Ministru, Jenerál Taur Matan Ruak no Reverendíssimo Bispo Dom Norberto do Amaral, Presidente da CET, asina ona iha Maiu 2022, ida-ne’e mak segundu kontribuisaun finanseira husi Governu Timor-Leste ba CET ba tinan orsamentál 2023.

Nune’e, Ministru Finansas dehan, Oitavu Governu Konstitusionál lideradu husi Primeiru-Ministru, Taur Matan Ruak konsidera katak importante tebes atu promove no hametin liután kontribuisaun no asisténsia husi Igreja katólika hodi hamosu forma kooperasaun foun ne’ebé sei benefísia Timoroan sira no nasaun iha futuru.

“Karik Ita hotu sei rekorda, iha maiu tinan kotuk, iha ámbitu Komemorasaun Vigésimo Aniversáriu Restaurasaun Independénsia Timor-Leste, Sua Eminência Dom Virgílio Cardeal do Carmo da Silva ho ha’u mós asina ona primeiru akordu kontribuisaun finanseira ba tinan orsamentál 2022. Ha’u fi’ar katak ho assinatura akordu ne’e, relasaun di’ak no kooperasaun ne’ebé forte entre Governu Timor-Leste no Konferénsia Episkopál Timorense ho sei metin no dura liután iha futuru,”dehan Ministru Finansas, iha sala Reuniaun MF, Aitarak-laran, Kinta (23/03).

Governante ne’e haktuir, Kompromisu ida-ne’e reflete ona iha alokasaun Orsamentu Jerál Estadu 2022 no 2023.

Iha OJE 2023 ne’ebé aprovadu liuhusi Lei n.º 15/2022,  21 Dezembro, Governu aloka orsamentu millaun $15 iha títulu “Dotasaun jeral estdau, ba finansiamentu instituisaun konfisaun relijioza.

"Hodi naran Oitavu Governu Konstitusionál, ha’u hakarak kongratula Konferénsia Episkopál Timorense no deseju susesu iha implementasaun programa no atividade sira," dehan nia.

Tan ne’e, Governu fi’ar katak kontribuisaun finanseira ida-ne’e nu’udar investimentu estratéjiku ida ba Nasaun Timor-Leste. Espera katak nia benefísiu ba Timoroan sira iha futuru, sei boot liufali montante osan ne’ebé mak Governu investe ona.

Iha fatin hanesan, Sua Eminência Dom Virgílio Cardeal do Carmo da Silva, SDB, Arcebispo Metropolita de Díli no Pró-Presidente da CET hatete, ho espiritu konkordata governu fó subsidiu subvensaun públika ne'ebé ohin asina ona akordu hodi hodi bele asesu ou transfere osan subvensaun CET ba tinan 2023.

"Los duni, durante tinan hirak nia laran, CET kuando simu osan ida ne'e depois fahe fila fali ba dioseze tolu no dioseze tolu aloka tuir persentajem hatur tiha ona iha akordu ne'e  rasik," dehan Kardeal.

Sua Eminênsia esplika, osan hirak ne'e sei aloka ba Edukasaun, servisu sosial no atividade seluk tan.