Diretór Gabineti Relasaun Externa no Komunikasaun Anacleto Caitano hatete, dezastre naturais ne'ebé estragus komunidade nia uma ne'e mai ho tipo oioin hanesan, rai-halai, ahi-han, anin-boot, udan boot no inundasaun.
"Tuir dekretu lei Nu.7/2021, katak estadu apoiu rekoperasaun ba vítima ne'ebé afeita ba dezastre naturais, tan ne'e husi dadus 2.161 halo fila fali reverifikasaun no hela uma 1.062 mak bele katogoriza hodi bele hetan apoiu rekoperasaun," dehan Diretor iha Salaun Konferensia APC Kaikoli, Segunda (28/07).
Diretór haktuir, husi dadus 1.062 ekipa APS halo reverifikasaun no iha uma ne'ebé iha kategori aat total hamutuk 329, aat total 199 no kaman 534.
Nia dehan, ba vitíma sira ne'ebé afeita ba dezastre naturais Autoriedade Protesaun Sivil husi Munisipiu no Nasionál fó ona apoiu emerjensia. Maibé ba rekoperasaun mak seidauk no tempu besik sei fó apoiu.
Enkuantu, antes ne'e ekipa APS halo ona apoiu rekoperasaun hanesan materia kontrusaun ba vitíma Afeitadu dezastre naturais iha Munispiu tolu hanesan, Ainaro, Manufahi no Kovalima hamutuk 88.
Maibé, Nia dehan, ba uma hirak ne'ebé foin mak hetan material konstrusaun, no seidauk hetan osan ba mão de obra no kustu transporte tuir kategoria , item no montante iha dekretu lei N.º 7/ 2021.
Entretantu, hahú husi loron 22-28 Augusto 2023 APS rejistu tan komunidade nia uma ne'ebé afeita ba dezastre naturais hamutuk 45 iha Munispiu 7.
Munispiu hitu hanesan, Aileu, Baukau, Ainaro, Manatuto, Vikeke, Ermera, Bobonaro no Rejiaun Administrativa Espesial Oekussi Ambeno (RAEOA).
