Hafoin governu dasia kaer ukun, mosu mudansa ba estatutu husi professor sira ne’ebé molok ne’e iha Ministériu Agrikultura, Pekuaria, Peska no Floresta (MAPPF) nia okos. La’os de’it simu posse hodi sai nu’udar Funsionariu Públiku, maibé sira mós transfere hodi ba iha Ministériu Edukasaun (ME) nia okos.
Tuir dadus husi MAPPF, professor na’in 100 resin ne’ebé molok ne’e iha MAPPF nia okos, muda ona ba ME nia okos. Profesor hirak ne’e hanorin iha eskola Natarbora, Fuiloro no Maliana.
Maske mudansa ne’e pozitivu tanba sira-nia estatutu ne’ebé molok ne’e nu’udar Ajente Administrasaun Públiku sai ba Funsionariu Públiku, maibé iha mós impaktu balun, liu-liu ba sira-nia salariu ne’ebé paradu durante fulan haat.
Profesor ida informa, durante fulan haat ona sira seidauk simu salariu. Ida ne’e akontese tanba tuir informasaun ne’ebé sira simu husi ME katak MAPPF entrega de’it naran husi professor sira ne’e ba ME maibé la intrega mós sira-nia salariu.
“Ami fulan haat ona la simu osan. Ami konfirma ho parte Ministériu Edukasaun, sira duun fali ba Ministériu Agrikultura, dehan sira intrega de’it naran mais la intrega ami-nia númeru ba salariu nian,” dehan professor ne’ebé lakohi públika nia identidade.
Ba kestaun ne’e, Diretór Rekursu Umanu, MAPPF, Hipolito da Costa hatete, governu dasia deside katak eskola sira ne'ebé tutela iha MAPPF iha tinan 2023 to'o 2024 entrega ba ME mak responsabiliza hodi organiza no jere tuir sira-nia polítika.
Tan ne’e, nia dehan, PM deside kria grupu servisu ba prosesu sira ne'e no iha tinan kotuk grupu husi MAPPF no ME identifika profesor sira hafoin iha desizaun kona-ba transferensia eskola ne'ebé tutela iha MAPPF ba ME atu jere ba profesor sira, inklui sira-nia salariu.
Ba professor sira ne’e, nia afirma, ekipa konkorda atu tau orsamentu no koloka tuir nesesidade ne'ebé durante ne'e sira iha.
Durante iha MAPPF nia okos, nia dehan, ministériu ne’e aloka orsamentu ho montante rihun $300 kada tinan.
Entretantu, to’o notisia ne’e hatuun, Jornalista Jornal INDEPENDENTE seidauk konsege halo konfirmasaun ho parte Ministériu Edukasaun.
