Responsavel Nutrisaun Sentru Saúde Formosa II, Amenia Sequeira Florindo Barreto de Jesus informa, iha tinan 2020 kazu ma-nutrisaun neebé rejista hamutuk 124, kompostu husi kazu moderadu 98, no kazu grave grave 26.
Enkuantu, iha tinan 2021, foin fulan lima nia laran, rejista ona labarik nain 92 mak sofre ma-nutrisaun, kompostu husi kazu moderadu nain 74 no kazu grave hamutuk 17.
“Iha tinan 2021 fulan lima de'it ita rejista ona labarik 92 mak afeta ba ma-nutrisaun grave ho moderadu, hanoin ida nee tenke foti medidas lalais husi inan-aman,” dehan Amenia iha nia knaar fatin, Tersa (01/06).
Nia hatutan, bainhira TL hasoru problema inundasaun, labarak barak mak sofre ma-nutrisaun, maibé inan-aman la lori ba fasilidade saúde sira.
“Iha fulan Abríl akontese inudasaun labarik barak mak sofre ma-nutrisaun, ita haree iha area Masin Lidun ne'eba, ekipa saúde tuun ba iha terenu, tein hahan ba labarik sira, hodi hatudu ba inan-aman sira bele banati tuir, maibé saida mak ami pesoál saúde sira koa'lia dala-barak liu nee ema la preokupa,” katak nia.
Iha fatin ketak, Dekanu Fakuldade Saúde Públiku Universidade Dili (UNDIL), Ivo da Costa hatete, númeru kazu ma-nutrisaun hahú aumenta tanba durante tinan ida ho balun mundu, inklui TL, sofre Covid-19, neebé fó impaktu boot iha produsaun alimentasaun.
“Ita-nia produsaun aihan menus nee tama ona ba tinan ida ho balun, ita haree iha Dili laran komunidade hakilar hamlaha, ita-nia Ministériu relevante sira laiha hanoin atu haree komunidade nia situasaun ida nee, iha osan atu sustenta moris ka lae?, ita haree Dili mak hanesan sentru ekonomia, sasán tama husi leste, oeste no sul, mais serka sanitaria taka dalan ba ema atu lori sasán tama mai Dili, automatikamente rendimentu ekonomia tuun, afeta ba oan sira hetan ma-nutrisaun,” dehan nia.
Jornalista: Gloria Maia
Editor: Jorgino dos Santos
