Diretora Nasionál Kontrolu Moras Hada’et, Josefina Clariña João hateten, Timor-Leste kompleta fulan tolu laiha kazu foun ba Covid-19.

Timor-Leste sei mantein kazu konfirmadu 24 ne’ebé rekoperadu. Kazu ativu ikus iha loron 15 fula- Maiu no agora dadaun seidauk iha tan kazu foun.

“Durante Ministériu Saúde hetan apoiu maka’as husi WHO no KOICA halo servisu vizilansia iha munisipiu hotu atu halo detesaun ba kazu foun,”dehan nia iha Otel Timor.

Nia dehan, servisu vizilansia nian durante ne’e apoiu husi WHO no KOICA, ekipa vizilansia husi nasional hamutuk ho ekipa vizilansia husi munisipiu halo ona monitorizasaun ba preparasaun fasilidade saúde sira hotu hodi responde ba Covid-19 nian liuhusi servisu triajen ne’ebé estabelese ona iha SSK hotu-hotu.

Nia apela ba komunidade sira hotu katak, maske Timor-Leste laiha kazu foun maibé nasaun viziñu Indonezia agora dadaun infrenta hela difikuldade kazu sa’e maka’as loos iha NTT to’o ona mai iha kabupaten Kefamenanu besik tan de’it mai TL. Tanba ne’e husu ba Munisípiu sira ne’ebé iha pontu entrada hanesan Bobonaro, Kovalima no Oekuse hametin liu tan vizilansia.

Nia esplika katak, servisu vizilánsia sentinela importante tebes atu monitoriza lalaok Covid-19 nian iha komunidade, tanba ne’e koordena malu nafatin implementa vizilansia sentinela ne’e iha munisipiu sira.

Tuir dadus Ministériu Saúde (MS) nian hahu husi loron 06 fulan-Marsu to’o iha loron 25 fulan-Jullu ne’e, ema ne’ebé halo teste hamutuk 3.807. Husi total ne’e, ema na’in 3.748 hatudu rezultadu laboratóriu negativu no na’in 35 maka hein hela rezultadu.