Prezidente Sentru Lojistik Nasionál (SLN) Agusto Junior Trindade informa, daudauk ne’e foos iha armajen governu hela tonelada 60.

Foos ne’e, nia dehan, nu’udar foos rai ne’ebé dulas husi hare ne’ebé governu sosa husi komunidade sira.

Maske stock foos hela uitoan de’it, maibé, nia dehan, sei bele auguneta tanba sei iha hare kulit tonelada 300 ne’ebé bele dulas hodi apoiu situasaun emerjensia balun.

“Se governu nia desizaun katak apoiu tan nesesidade baziku, SLN hamrik iha liña dahuluk atu responde buat ida ne’e, ita bele dehan katak politika ida ne’e ami hein orientasaun bainhira mak despaisu tuun ami buka dalan atu responde,” dehan Agusto iha nia serbisu fatin, Mandarin, foin lalais.

Nia hatutan, maske TL monu ba situasaun inserteza, maibé buat ne’ebé serteza mak stock foos tenke iha, no governu sei buka dalan oioin atu armajen labele mamuk.

Ekipa ida husi SLN serbisu hamutuk Japan International Cooperation Agency (JICA) lori saku mamuk ba fahe iha komunidade sira iha Sare, Ermera, ne’ebé faan haré hodi ense, hafoin SLN ba sosa.

“Sentru lojistiku mós koalia ho kompañia sira atu dulas tan haré kulit ne’ebé iha atu aumenta tan. Prosesu sira ne’e atu ajuda ou komplementa de’it ita-nia nesesidade ba demanda foos, ita-nia demanda foos mós boot maibé situasaun ida agora iha tiha inserteza nia laran,” nia dehan.

Bainhira pandemia Covid-19 la’o nafatin, Prezidente SLN ne’e preokupa uitoan ho produsaun rai laran bele asegura stock nasionál ka lae.

“Tanba ne’e SLN husu kompañia privadu sira mós bele halo importasaun (foos) no mós komunidade sira fila fali ba natar hodi hasa’e produsaun,” dehan nia.

Aleinde ne’e, nia hatete, preokupasaun kona-ba stock foos bele responde uitoan bainhira foos ne’ebé governu sosa husi rai li’ur to’o ona iha TL.

Entretantu, tuir informasaun, foos tonelada 90 ne’ebé governu sosa husi rai li’ur, iha Kuarta (12/08) horseik, to’o ona iha portu Dili.