Diretór Ezekutivu FONGTIL, Daniel do Carmo hatete, Governu iha seriedade ba OJE 2022 ne'ebé mai ho fundamentu kapasidade, iha analiza konstetual no analiza situasaun iha Timor-Leste.
Nune’e, hodi identifika setores sira ne'ebé iha prioridade, aseita duni ba desafiu povu no sustentabilidade.
"Iha programa prioridade neen (6) ne'ebé iha jornada orsamental ba Orsamentu Jeral Estadu tinan 2022,”dehan nia iha konferensia imprensa iha salaun FONGTIL, Kaikoli, kinta horseik (08/07).
Tanba ne’e, iha OJE ne’e hodi tetu mós orsamental fiskal tinan 2022 hamutuk dolar amerika billaun $1,5 hodi define ba programa prioridade neen hanesan, setor sosiais, edukasaun, saúde, ambiental, infrastrutura no setor produtivu.
Enkuantu, FONGTIL fiar katak ho definisaun prioridade nasional ba tinan fiskal 2022, sei tulun no hadia edukasaun ne’ebé susesu ho kualidade.
“Ita hatene katak agora dau-daun ita infrenta hela desafiu lubuk ida iha prosesu dezenvolvimentu edukasaun iha aspetu kurikulu, kualidade no mós kuantidade ba iha professor, ba materia aprendijazem nian no fasilidade apoia sira seluk,”tenik nia.
Tuir nia, iha situasaun difisil liu tan bainhira ho ezistensia pandemia Surtu Covid-19 iha tinan rua ikus ne'e, hodi destroi kalendariu aprendijazem akademika, tanba ne'e obrigadu tenke halo suspensaun ba aula prezensial to’o iha ezame.
Entretantu, iha OJE 2022 tau mós programa prioridade hanesan iha setor saude nian,atu hodi bele tulun ba povu Timor-Leste atu bele asesu ba iha prestasaun servisu ne'ebe di'ak no besik iha sira nia hela fatin, atu hodi bele hetan tratamentu regural husi mediku ne'ebe matenek no prosional.
Aliende, iha mós programa prioridade ba Iha produsaun agrikultura nian hodi bele aumenta no reforsa familia agrikutor sira atu kontinua halo produsaun hodi hetan rendimentu ne'ebé bo’ot hodi bele Hadia sira nia ekonomia familia nian.
Enkuantu, FONGTIL mós deklara, sei apoia ba inisiativa Governu nian hodi hadia povu nia moris liu husi dalan OJE 2022.
Nune’e, Governu Timor-Leste Iha ona preparasaun ba planu osamentu sira hodi kontinua halo misaun atu bele liberta povu hosi kiak no mukit.
