"Haree regra sira ne'ebé implementa iha estadu emerjénsia nian ne'e so iha de'it surat tahan leten, kuandu ita haree ba regra nian ba dala-7 ka ba dala-8 nian ida ne'e hateten katak sidadaun sira ne'ebé maka halo movimentu ilegal iha liña fronteira sei multa too $200 maibé sidadaun sira ne'ebé durante ne'e kaptura iha liña fronteira ne'e iha ne'ebe. Tanba ne'e maka ita labele implementa regra sira ne'e berlebihan depois ita la halo ninia aplikasaun,"dehan nia bá jornalista Independente iha nia knaar fatin, Fomento (08/01).

Tuir nia katak, PNTL tenki iha kapasidade atu aplika regra sira la ho violasaun ba direitu umanu.

"Portantu ita haree buat balu ne'ebé ita akompaña iha regra ne'e hatene katak ita labele halibur malu liu ema na’in 10 maibé kuandu ita haree operasaun balun ne'ebé iha dalan Polísia balun hala'o too 10 resin depois sira halo check point inklui maluk media sira iha laran ida ne'e ita haree ladún serbisu di'ak ba iha regra ne'e rasik,"dehan nia.

Iha implementa regra ne'e mós obriga sidadaun sira tenke iha máskara maibé iha foto balun nia haree dala barak autoridade balun ko'alia atu implementa regra ne'e maibé sira rasik laiha preparasaun ne'ebé di'ak.

Tanba ne’e, tuir Mahein presiza haree no halo avaliasaun oinsá atu bele aplikasaun regra ida ne'e ho ónestu.

Aliende ne’e, Peskijador husi Fundasaun mahein ne'e husu atu implente regra estadu emerjénsia ne'ebé rigor iha liña fronteira sira tanba tuir nia iha kazu Timor seidauk iha tranzisaun lokál maibé problema kazu importadu husi rai liur.

"Ha'u hanoin ida ne'e ladún di'ak karik di'ak liu ita rejolve iha fronteira para oinsá ita reforsa kontrolo sira iha liña fronteira sira,"nia rekomenda.

Entretantu Tuir observasaun husi jornalista Independente iha terrenu Polísia Nasionál Timor-Leste (PNTL) kompostu husi ekipa Ministru Saúde no Crus Vermella Timor-Leste (CVTL) kontinua halo desiminasaun ba regra estadu emerjénsia inklui fahe brosura prevensaun ba moras Covid-19 no moras oin-oin iha kapitál Dili.