Ekipa Ministeriu Saúde Pillar III ne’ebé tau matan ba vijilansia no epidemolojia to’o iha fatuhad hodi halo teste PCR no konfirmadu, matebian hetan infetadu ho Covid-19.

Koordenador Pillar III Carlito Correia Freitas hatete katak, aliende konfirmadu infetadu ho Covid-19, matebian sofre moras komplikadu.

“Sidadaun ne’e ohin dader porvolta 11 meia hanesan ne’e, ami husi Pillar III ne’ebé tau matan ba vijilansia no epidemolojia ho investiga kazu, ami simu informasaun kontaktu husi hotline 119 katak iha sidadaun ida ne’ebé servisu iha benkel DIAMOND ne’e iha atakasaun monu tun mate fatin kedas, entaun ha’u organiza ami nia ekipa ida mai iha ne’e halo negosiasaun ho familia no halo investigasaun ba iha matebian ne’e nia familia hafoin ami halo teste Swab, depois liu tuku 2:00 lokraik hanesan ne’e ami simu rezultadu husi Laboratorium Nasiónal Saúde rezultadu hatudu positivu ba Covid-19,”dehan nia iha fatuhada sabado ohin (15/05).

Nune’e, Koordenador Pillar III kontaktu ba Pillar ne’ebé relevante hanesan Pillar I no seluk tan, sira ne’ebé toma konta ba koveirus óbitu nian atu hahú prosesu.

Iha fatin ne’e mós Ekipa Pillar III fó mós esplikasaun ba familia matebian kona ba prosesu ne’e. Tuir informasaun matebian husi Munisipiu Lautem.

“Ami hamutuk ho Pillar relevantes toma konta ba óbitu nian negosia ho familia deside katak ohin ne’e ita tenki lori matebian ba tau iha konzelador, depois ita sei hamutuk ho familia fó hatais nia. No aban dader hein rezultadu familia ne’ebé akompaña matebian ba Lospalos hodi halot,”tenik nia.

Nune’e matebian sei ba halo’ot iha nia moris fatin munispiu Lautem tuir regras protoku Organizasaun Mundial Saúde nian.

Entretantu, Inacio de Arauju fó sasin katak, nia rona kalen pintor tarutu no haree matebian latan hela iha rai.

“Kolega ida haruka ha’u atu bolu tiu Lipe (matebian) no ha’u mós bolu maibé nia lahatan no ha’u kontinua fase ha’u nia faru, ha’u fase hotu ha’u rona kalen iha fatin pinta kareta sira ne’e tarutu, entaun ha’u loke ba haree tiu lipe (matebian) toba hela, nia haruka ha’u ajuda fui bee, depois ha’u dehan lae, ha’u bolu kolega ne’e mai lai, nia (matebian) haruka mós atu fui bee ba, maibé patraun feto haruka ha’u bolu nia familia no hetan nia oan mane bo’ot mai to’o iha fatin matebian iss laiha ona,”dehan Inacio.

Enkuantu matebian transporta ona Sala Izolamentu Vera Crus no familia iha ona konkordansia ho Ekipa Saúde lori ba matebian nia uma iha Fatuhada, antes ba haloot iha Munisipiu Lautem.  

Asistente Editor: Saturnina da Costa