Ministru Prezidensia Konsellu Ministru (MPKM), Fidelis Magalhães hatete, nia parte seidauk simu nota ruma husi PR, tan ne'e nia lakohi fó komentáriu detallu.
"Ami seidauk bele komenta bu'at ruma, tanba ha'u rasik seidauk simu nota ruma husi husi parte Prezidensiá Repúblika kona-ba pozisaun ita nia Prezidensiá Repúblika nian ne'ebé ha'u seidauk bele komenta bu'at ruma kona-ba asuntu ne'e," dehan nia, iha Palásiu Governu, horisehik.
Nia afirma, karik iha nota ruma ka desizaun ruma husi Prezidente Repúblika naturalmente hanesan ezekutivu sei foti medida ruma para ne'ebé adekuadu para atu refleta preokupasaun hirak ne'e, mais purenkuantu seidauk simu informasaun ruma.
"Ha'u seidauk hatene, ha'u fi'ar katak husi ami nia Gabinete mós seidauk hatene. Agora bu'at ne'ebé ita boot sira temi ne'e dala ruma keta interpretasaun prezidente nia liafuan karik, dala ruma intensaun prezidente nian ne'e la hanesan ho interpretasaun detallu ida ne'e mós hanesan ita espekula de'it, ne'ebé ha'u hanoin di'ak liu ita lalikan espekula, ita boot sira mós lalika espekula ha'u mós lalika hatan ho forma espekulativa ba deklarasaun ruma, pozisaun ruma ba ita nia xefe estadu nian," nia akresenta.
Nia dehan, ne'ebé hein Komunikasaun sira ne'ebé hatuur ka liu husi kanal sira, hafoin xefe estadu hola pozisaun ruma husi parte ezekutivu nian sei foti medida sira.
"Ne'ebé la'os bu'at foun ba ita ninia estadu atu funsiona hanesan ne'e, bainhira órgaun sira presiza atu iha intendimentu hanesan, Komunikasaun ne'e la'o ne'e la'os de'it ba ida ne'e, mais ba hotu-hotu bu'at barak ke adata ne'e la'o hanesan ne'e," nia dehan.
Nia dehan, tantu husi Governu nian sempre komunika ho Parlamentu Nasionál, Prezidente Repúblika para ke órgaun soberanu sira atu serbisu hamutuk ho objetivu ida de'it.
Objetivu ne'e mak ba dezenvolvimentu Timor-Leste nian atu lori bein estar ba sidadaun sira hotu iha territoriu Timor laran.
Entretantu, Prezidente Repúblika José Ramos Horta simu ona dekretu lei númeru 37/2022 kona-ba subsídiu uma kain fim du anu $200, maibé sei tetu husu alterasaun ba lei refere molok foti desizaun.
"Lei subsidiu uma kain iha ona ha'u nia meja leten, ha'u gosta liu lei ida anteriór tanba lei anteriór ne'ebé governu halo ne'e mak di'ak lo'os, tanba subsidiu ne'e fó de'it ba uma kain sira ne'ebé kiiak liu ka vulneravel loos, lalika fó ba hotu-hotu ida ne'e mak loos," Konferênsia Nasionál Subsídiu Ideias atu konstrui Istória Timor Leste tinan 1974-1975" iha Ministériu Defeza Fatuhada (25/10).
Nia dehan, nia parte husu, lei foun ne'e di'ak liu mak halo tuir de'it lei antigu, maibé sei iha Prezidente nia meja leten, no sei halo reflesaun didi'ak no sei ko'alia fila fali ho reprezentate povu iha uma fukun PN deputadu sira atu haree.
Tanba ne'e, situasaun difisil buka ajuda populasaun, tanba ne'e buka atu ajuda populasaun lalika ba tan sira ne'ebé iha empregu no vensimentu di'ak ne'e lalika.
"Ha'u seidauk iha desizaun na lei ida ne'e, atu veta ka promulga," dehan nia.
